Пичиысен ог-огзэс гажаса будо

Россиын котьку трос пӧртэм калыкъёс улӥзы. Нылпиос пичиысен ик анай-атай кылзэс, соослэсь сям-йылолъёссэс, лулчеберетсэс дышетыса будӥзы. Свердловск улосвылын али ке но пӧртэм калыкъёс – ӟучъёс, бигеръёс, чувашъёс, мордваос, удмуртъёс но мукетъёс – эшъяськыса уло. Нош ми, дышетон удысын тыршисьёс, соосты котькудзэс анай кылзэс гажаны дышетӥськом.

Асьмелы, эшлыко кусыпъёсты утён понна, вӧзамы улӥсь калыкмылэсь лулчеберетсэ, сям-йылолъёссэ тодоно. Ог-огдэ гажан мылкыдэз нылпиосмылы пичиысен пыӵатыны тыршоно. Ӵапак таӵе малпанъёсын ужаськомы ми Екатеринбургысь 101-тӥ номеро нылпи садын. Кема ӧвӧл ми нылпиосмес удмуртъёслэн улонэнызы тодматӥмы. Со понна ужамы паськытгес кутӥмы Удмурт Элькунэн герӟаськем материалъёсты. Озьы нылпи садэ ветлӥсьёс Удмуртилэн куншетэныз, кункрезеныз (гимнэныз), удмурт калыклэн кылыныз, Ижевсклэн данъяськымон интыосыныз тодматскизы. Нош суредаськонъя урокын пиналъёсмы удмурт дӥськутэн мунё пӧрмытӥзы.

Нылпиослы тужгес кельшиз Удмурт Элькунысь усточиослэн киосынызы быдэстэм ужъёсын тодматскон. Со сяна, соос шумпотыса пыриськизы «Магазин народных сувениров» дидактической шудонэ. Отын котькуд пиналлы арбериосты кызьы но малэсь лэсьтэмзэс, соослэсь кытын кутӥськемзэс верано вал.

Та выллем ужрадъёс пиналъёслы вордскем шаермы сярысь трос выльзэ сёто, атыкай музъемен данъяськыны, солэсь чеберзэ валаны дышето.

Тамара САДИУЛЛИНА,

Алёна ПЕТУХОВА.

Екатеринбург.