-17 °С
Салкым
Антитеррор
Вань иворъёс
Общество
10 куартолэзе 2018, 12:11

"Ӵошен котьмае вормыны капчи"

Трос нылпиё семьяос – пичи гуртлэн вуоноезБурай ёросысь Мамады гуртын трос нылпиё семьяос чиньыен лыдъямон гинэ. Соос пӧлысь одӥгез – Шаяхметовъёс. Соос выль ӝутэм юртазы сизьым кузя тупаса уло.

Трос нылпиё семьяос –
пичи гуртлэн вуоноез
Бурай ёросысь Мамады гуртын трос нылпиё семьяос чиньыен лыдъямон гинэ. Соос пӧлысь одӥгез – Шаяхметовъёс. Соос выль ӝутэм юртазы сизьым кузя тупаса уло.
Миляуша но Фликс Шаяхметовъёслэн семьязы 1999-тӥ арын кылдэм. Кузпалъёслэн куинь нылпиоссы. Альбина нылзы Бирскын фармацевтлы тодон-валан басьтэ, Станислав пизы Бурайысь гимназиын 6-тӥ классын дышетске, нош пичи Данииллы кык арес но ӧвӧл на. Соосын ӵош Фликслэн анаен атаез - Альфия апаен Мулланур агай - уло.
- Мон ачим но трос нылпиё семьяын будӥ, вить кузя ми будӥм, - шуэ Миляуша Миншариповна. Солэн вордӥськем гуртэз - Байшады. Вуоно кузпалыныз со ӝыт шудонын пумиськем. Фликс эшез доры куное лыктэм вылэм.
Мамадые бызем бераз, Миляуша уж сюрессэ гурт хозяйствоысен кутскем: кунян утем, скал кыскем. Берло со гуртысьтызы клубен кивалтэм. Али Миляуша пичи пиеныз пуке. Кузпалыз но гурт хозяйствоын ужам. «Гужем Фликс шофёрын тырше вал, толалтэ – скотникын. Но огдыре хозяйствоын коньдонэн туж секыт луиз, уждун дыраз уг тыро вал. Соин ик со палэнэ ветлыса ужаны кутскиз», - вера Миляуша.
Даниил пизы вордӥськем бере, Шаяхметовъёслы Бурае ӝутӥськыны инты сётӥллям. «Каллен корка ӝутон борды басьтӥськыны малпаськом. Малы ке шуоно гуртын начальной школа гинэ. Витетӥ классысен нылпидэ интернатэ лэзёнэз анай-атайлы капчи ӧвӧл», - шуэ М. Шаяхметова.
Арлыдо кузпалъёс
Альфия но Мулланур Шаяхметовъёс 46 ар улон сюрес кузя ӵошен вамышто ни. Со аръёс ӵоже соос улонлэсь секытлыкъёссэ но вормыса потылӥллям, шумпотонъёссэс но шори люкылӥллям.
Альфия апаен Мулланур агай кыксы ик Мамады гуртын вордӥськыса будӥллям. Соос вордӥськем гуртазы ик выжы лэзиллям. Мулланур агай гурт хозяйствоын охранниклэсь ужзэ быдэсъям, комбайнын но ужам.
Альфия апайлэсь улон сюрессэ капчи вылэм уд шуы. Ортчем аръёссэ тодаз вайыкуз, арлыдо кышномуртлэн пушкыз тыре, синкылиосыз быльырско.
- Мон анаен гинэ будӥ. Витетӥ классэ Алтауысь школае дышетскыны ветлӥськом вал. Отысь интернатын улӥм. Куддыръя дышетскыны валэн нуыса кельтозы вал, нош бертыны – пыдын. Озьы ке но дышетскыны уг мынӥськы ноку ӧй шуы. Тямыс класс бере фермае ужаны потӥ, парсь утьыны. Собере Казахстанэ ужаны кошки. Отын чугун сюрес вылын ужаку, поезд улэ шеди, пыдтэк кыли. Мон дас куать аресысеным инвалид ни, - вера Альфия апай.
Кышкыт учыр бере, егит нылаш вордӥськем гуртаз берытскем. Солы секыт ке но луэм, ужатэк пукыны чидамтэ. Вуриськисьлы дышетскыны мылкыд карем. «Бурайысь «Дом быта» Уфае вуриськисьлы дышетскыны лэзиз. Азьло «Дом быталэн» гуртлы быдэ, шуыны луоз, ёзэтъёсыз ужазы. Гуртысь школаын буфетчица луыса но ужай. 1990-тӥ арысен уг ужаськы ни», - вера арлыдо кышномурт.
Кызь кык аресаз Альфия апайлэн улон сюресэз Мулланур агаен герӟаськем. Соос семья кылдытыса, кык нылпи вордӥллям. «Милям ньыль внукъёсмы но одӥг правнукмы вань ини. Соос вӧзын дыръя, висёнъёс но вуно. Ӵошен улон но шулдыргес, ӵошен котьмае вормыны капчи», - шуо арлыдо кузпалъёс.
Миляуша
НИГАМАТУЛЛИНА.
Бурай ёрос.
Читайте нас в