Шумпотонэз синкылиен тырмемын

Балтач ёросысь Кизганбаш гуртын улэ ож мышкысь ветеран Исламша Зиннатович Тимуршин. Туэ солы 90 арес тырмиз. Озьы ке но со ортчем секыт аръёссэ ӟеч тодэ, улон шоры чебер малпанъёсын учке. Исламша Зиннатович ӵемысь, пе, тодаз вайылэ шаермылэн историысьтыз одӥг люкетсэ – Быдӟым ож аръёсты. Жаляса верано, ветеранэн пумиськылыны ӧз кылды. Но Быдӟым Вормон Нунал азьын интернет пыр солэн Нефтекамскын улӥсь Лиза нылыныз кусып тупатыны быгатӥмы.

Республикаямы Быдӟым Атыкай ожын тушмон пумитэ кышкатэк султэм, ож мышкын жадёнэз валатэк Быдӟым Вормон понна тыршем адямиослэн лыдзы арысь аре кулэсме. Соин, вылды, ветеранъёсмылэн тодэ ваёнъёссы асьме понна туж дуно. Лиза Тимуршиналэн атаез сярысь верам кылъёсаз ож вакытэ будэм, ужам адямиослэн секыт адӟонъёссы шӧдӥське. Ож мышкысь ветеранлэн нылыз вера:

- Атае бадӟым кужмо семьяын вордскиз. Со кык апайёсыз бере куинетӥ пинал вал. 1941-тӥ арын 22-тӥ инвожое Кизганбашысь калык сабантуе люкаськем. Атае отысен ик Быдӟым Атыкай ож кутскем сярысь кылэм. Соку солы 13 арес вылэм. Гуртысь пиосты нуналлы быдэ оже басьтыны кутскиллям. Кизганбашысь 103 адями тушмон пумитэ султэм. Гуртэ пересьёс, нылкышноос но пиналъёс кылиллям. Соин ож арлэсь секытъёссэ ӧжыт адӟиллямтэ. Ю-нянь октон вакытэ соос нуналаз 16-17 час ужаллям, киын араллям-кутсаллям, ю тысьсэс Бирске ошъёсын нуллӥллям – валъёссэс оже басьтӥллям. Гурт калык сютэм ужам. Та вакытэ егит нылъёсты Бирске трактористъёсты дасясь курсъёсы дышетскыны лэзиллям. 1941-тӥ арын гуртэ нырысетӥзэ питрано тракторез ваиллям. Ож аръёсы Кизганбашын Москваысь, Ленинградысь эвакуировать карем адямиос трос луиллям. Соос капчигес улӥллям – колхозысь сиён-юон басьтылӥллям, нош гурт калыклы сое сётӥллямтэ. Атайлэн верамезъя, соос потлэсь пыжем нянен кӧтсэс тыриллям. Нош тулыс, картофка шедёз шуыса, олокӧня пол бакчазэс гудылӥллям.

Гурт калыклы 11 пӧртэм выт тыроно луэм, кылсярысь, 300 литр йӧл, ыжгон, курегпуз, картофка, чечы но мукет. Бадӟымъёс трудоденьлы ужаллям, пиналъёссэс пӧзьтэм пызен но картофкаен сюдӥллям. Гурт калыклэн ӝӧк вылаз картофка ке пуксе, со бадӟым шумпотон вылэм. Выт тыронъёссы бадӟымесь луэмен, адямиос вазь тулысысен бер сӥзьылозь нюлэскы турын-куаръёсты, емышъёсты, мульыосты бичаны ветлоно луиллям.

Нылпиос, дӥськутсы луымтэен, тросэз школае ветлӥллямтэ. Та вакытэ нылпиос туж куанер дӥсяськиллям. Школаын вуж газетъёсы эгырез вуэн сураса яке гордкушман сокен гожъяськиллям. Кык-куинь пиналлы одӥг букварь сётӥськем. Урокъёссэс керосин лампаен яке чаг кенӝытыса лэсьтӥллям.

Атай сизьым классэз йылпумъям. Ож кутскем бере колхозэ ужаны потэм. Гужем со бусыын тыршем, ю тысез Бирске элеваторе нуллэм, отысь керосин ворттэм. Толалтэ бригадазы фронтэ келяны нюлэс корам. Тол куазен соослы векчи дӥсен ужано луэм. Озьы ке но сютэм калык секытъёслы сётскымтэ.

1945-тӥ арын, тулыс, атай кизьыны потыны дасяськыса, бускель гуртысь кидыс вайыса бертэ вылэм. Соку ыбылэм, шумпотыса серекъям куара кылэм. Озьы со тодэм Быдӟым Вормон сярысь. Гуртэ 41 адямиос берытскиллям, 61-ез весяклы ож бусые кылиллям. 1945-тӥ арын атайлэсь огъёзъёссэ армие басьтӥллям. Соос немецъёсын но ожмаськыны вутскиллям, Япон оже но пыриськиллям. Ож бере соос 7-8 ар служить кариллям. Уг тодӥськы, кыӵе малпанэн улӥз меда соку атай… Сое синмыныз сӧсыр луэмен (одӥгез синмыз пичиысен уг адӟы) оже басьтӥллямтэ. Озьы ке но атай ож аръёслэсь вань секытсэ адӟем, Быдӟым Вормонын но солэн кужымез ӧжыт ӧвӧл.

Ож бере атаез тракторной бригадае бригадире но агротехнике юнматӥллям, нош тракторен нылъёс ужаллям. Соос али ке но атаен ӵошен ужам аръёссы сярысь шунытэн тодазы ваё. Атай али ке но ӟеч тодэ котькуд бусылэсь быдӟалазэ. 1956-тӥ арын сое, сюлмысь тыршемез понна, ВДНХ-е колхозникъёслэн слётазы вуылонэн данъяллям.

Атаелэн быдэс улон сюресэз колхозэн герӟаськемын: со электрикын ужакуз гуртэ тыл пыртӥз, пудоосты утиз, весовщикын ужаз, итымен кивалтӥз. Аслаз улоназ со куинь улон юрт пуктӥз. Одӥгзэ гинэ со али ке но жаля, сизьым арлэсь тросгес дышетскыны ӧз быгаты шуыса. Озьы ке но атае чебер гожъяське, капчиен лыдӟиське. Ож бере солы ужано, вить пичи сузэр-вынъёссэ будэтоно луиз».

Исламша Зиннатович кузпалыныз ньыль нылпи будэтӥзы. Соос туннэ ваньзы пыд йылазы йыг-йыг султэмын. Будэтэм нылпиосызлэн вормонъёссы шоры учкыса, ветеран пумтэм шумпотэ. Но, жаляса верано, 2013-тӥ арын, сое огназэ кельтыса, кузпалыз улонэн люкиськиз.

Кизганбашысь ветеранлэн нылпиосыз туннэ ог-огзылы юрттыса уло – озьы дышетӥзы анай-атайзы. Со понна соос выжыоссылы йыбыртто но сюлмысь тау каро.

Дасяз Ольга

НИГАМАТУЛЛИНА.