-18 °С
Салкым
Антитеррор
Вань иворъёс
Общество
5 апрель 2018, 12:28

Ужаны но вутско, шутэтскыны но дыр шедьто

Башкортостанын 400-лэсь трос семьяос «Устойчивое развитие сельских территорий» программая улон интызэс умоятӥзы ни. Федерал программа 2014- 2020-тӥ аръёслы чакламын. Та кун юрттэтэн Янаул ёросысь Максим гуртысь Инзиля но Радис Сатлугановъёс но пайдаяськизы.

Башкортостанын 400-лэсь трос семьяос «Устойчивое развитие сельских территорий» программая улон интызэс умоятӥзы ни. Федерал программа 2014- 2020-тӥ аръёслы чакламын. Та кун юрттэтэн Янаул ёросысь Максим гуртысь Инзиля но Радис Сатлугановъёс но пайдаяськизы.
«2014-тӥ арын фундамент понӥм. Ӝутыны асьме кужымен кутским. Юрттэт кылем арын оштолэзе басьтӥмы. Солэсь азьвыл юртмы липет улэ пыртэмын ни вал, - вера Радис Тимерянович. – Корка пуш ужъёс быдэстэмын шуыны луоз. Газ пыртыны куазьлэсь шунамзэ витиськом».
Семьялэн «йырыз» 109-тӥ пожарной частьын кызь арлэсь кема ни водительын тырше. Нефтепаркъёсты но котырысь гуртъёсты, пе, эскерыса улӥськом. Инзиля кузпалыз кызь арлы матэ гуртысьтызы нылпи садын воспитательын тыршиз. Сокращение шедьыса, яратоно ужезлэсь люкиськоно луиз. «Нылпи садэ соку 22-25 пӧртэм аресъем нылпиос ветло вал. Соосын ужаны капчи шуыны ӧй луысал. Уго котькуд нылпилэсь арессэ лыдэ басьтыса, солы тупась дышетон программаен ужано луылӥз», - ужан аръёссэ тодаз вайыса вера Инзиля Владимировна.
Сатлуганов кузпалъёслэн кык нылпиоссы. Ангелина нылзы гуртысьтызы школаез йылпумъяса, Сарапулысь медицинской колледжын фельдшерлы дышетске. «Ангелинамы ӵужапайёсызлэсь адӟем кариз, луоз. Соос – фармацевтъёс. Нылмы туэ берпуметӥ арзэ тодон-валан басьтэ. Стипендия басьтыса, умой дышетске, - вера Инзиля Владимировна. – Денис пимы укмысэтӥ классын дышетске. Милемыз ньыльёсын но витьёсын гинэ шумпоттэ».
Кузпалъёс кызь кык ар ӵоже ни Радис Тимеряновичлэн анай-атаеныз ӵош одӥг липет улын ог-огзэс валаса уло. Назия апай кема аръёс ӵоже скал кыскисьын тыршем. Фермаын секыт ужъёсты быдэсъяно луэм. «Скалъёсты киын кыскимы. Асьмеос ик пудоослы ву ворттӥмы, силос пыртамы, апразэ дасямы. Вань ужъёсты киын быдэсъямы», - ужан аръёссэ тодаз вайыса люкиське кышномурт. Тимерзян агай нырысь гурт удысын пӧртэм ужъёсты быдэсъям, собере тракторын тыршем. Берло со связьын монтёрын ужам. «Али пудоос котырын берга. Ӵукна потыса кошке но, кӧттырыны гинэ пыре», - вера Назия апай. Аслаз но солэн ужтэк пукыны сюлэмыз уг чида. Ыж гонэз лӧдыса, черсыса нырос-пӧзьыос керттэ, нылпиоссэ шумпоттэ. Со сяна, уждурысьтызы вуэм нылпиоссэ выль нянь пыжыса но сиён пӧзьтыса котьку пумита.
Егитъёсыз Сатлугановъёс ужаны но вутско, шутэтскыны но дыр шедьто. «Толалтэ ми нылпиосын, бускельёсын ӵош люкаськыса гурезе нискыланы тубаськом, - вера Инзиля Владимировна. – Озьы ми улыны но ужаны выль кужым люкаськом».
Марина НИКОЛАЕВА.
Янаул ёрос.