Жингрес нылпи куара – юртлэн шулдырез

Музъем вылын сизьым но ӝыны миллиардлэсь трос калык улэ. Адямиос сизьым сюрс пӧртэм кылъёсын но диалектъёсын верасько. Пӧламы олокӧня кылъёсты тодӥсьёс, суро семьяос но трос пумисько. Соос куспазы туж тупаса уло.

Калтасы ёросысь Качкин-Турай гуртын улӥсь Алина но Владимир Нигаматзяновъёслэн семьязы 8 ар талэсь азьвыл кылдэм. Алина Григорьевна Марийский Бикшик гуртын вордӥськыса будэмын. Но соин вераськыса, со пор семьяысь шуыса уд но малпа, Алина удмурт кылын чебер но вольыт вераське. «Алина удмурт сямен милесьтым но умойгес тодэ, дыр», - шуо гуртооссы А. Нигаматзянова сярысь.

Кузпалъёс кыкназы но «Восход» СХК-ын ужало, Алина - техник-осеменатор, Владимир – пудо утись. Нигаматзяновъёслэн куать аресъем Ваня пизы но куинь аресъем Полина нылзы будо. Кузпалъёс Владимирлэн вордӥськем гуртаз, Качкин-Турае, выль юрт пуктӥзы. «Корка ӝутыку «Социальное развитие села» кун программаен пайдаяським. Кылем арын, сӥзьыл, выль коркамы улыны выжим», - вера Владимир Михайлович.

Алина Григорьевна ваньмон дырзэ нылпиосызлы, дорезлы, пе, сӥзисько. «Ваня Бадӟым Качакысь нылпи садэ ветлэ, нош Полинаез садике ӧм сётэ на. Ми ужын дыръя, со песяез дорын», - шуэ анаймурт.

Нигаматзяновъёслэн бадӟым, югыт но шуныт юртазы татулык кузёяське, нош жингрес нылпи куараос соослэсь улон «карзэс» эшшо но шулдыргес каро.

Миляуша БУЛАТОВА.

Калтасы ёрос.