-18 °С
Салкым
Антитеррор
Вань иворъёс
Общество
7 южтолэзь 2018, 14:13

Книгаос пӧлын, тунсыко дуннеын

Калтасы ёросысь Бадӟым Качаке вуылыкумы, гуртысь модельной библиотекаын ужасен Лидия Насипуллинаен тодматски.

Макем Лидия Ивановна ас ужзэ гажа, яратэ, солэн вераськемезъя ик валаны луэ. Быръем ужаз со кызь укмыс арлэсь кема тырше ни. Со Уфаысь библиотечной техникумез йылпумъям.
Кин со – библиотекарь? Библиотекарьлэн ужез тужгес вашкала ӧнерен лыдъяське, со ньыль сюрс но ӝыны ар талэсь азьвыл кылдэмын. Туннэ нуналэ но библиотекаос быремын ӧвӧл, соос уло, нош отын ужасьёс адямиослы визьнод люкан сюресэз югдытӥсь тылси выллем луо. Библиотекаын ужась - со книга сётъясь гинэ ӧвӧл, ас ужзэ яратӥсь библиотекарь лыдӟисьёслы одно ик тунсыко книгаос, журналъёс ӵектоз, авторен кылдытэм аспӧртэм «дуннее» сюрес возьматоз.
Тросэз шуозы, туннэ книга лыдӟисьёс туж ӧжыт, библиотекарьлэн ужез мӧзмыт. Но Лидия Ивановналэн мӧзмыны дырыз ик ӧвӧл. Быдэс арлы ужан план гожтоно, пӧртэм-пӧртэм тематикая книгаослы адӟытонъёс радъяно, ужрадъёс но дасяно, собере вань быдэстэм ужед сярысь отчётъёс но лэсьтоно. Проектъёс гожъян бордын но Лидия Ивановна трос тырше.
- Ужаны кутскем аръёсты али дырен ӵошатоно ке, лыдӟисьёс арысь аре кулэсмо. Азьло ӝытъёсы библиотекае трос калык люкаське вал, нылпиосын ӵош арлыдоос но книга лыдӟыны яратылӥзы. Туннэ лыдӟиськисьёс туж ӧжыт. Ваньмыз со интернетэн герӟаськемын, дыр, - вера Лидия Ивановна. Озьы ке но качакъёс библиотекае сюресэз вунэтӥллям шуыны уг луы. Татын нылпиослы, арлыдоослы, кема аръёс ӵоже ӵош улэм кузпалъёслы сӥзем ужрадъёс но радъясько, калык праздникъёс но палэнэ уг кылё. «Ужрадъёсты трос дыръя культура юртын ужасьёсын ӵош дасяськом», - шуэ библиотекарь.
Бадӟым Качакысь библиотекаын удмурт калык творчестволы сӥзем сэрег но вань. Отын удмуртъёслэн вашкала дӥськутъёссы, ужан тӥрлыкъёссы возисько. Быдӟым Атыкай оже пыриськемъёслы, ож мышкын тыршемъёслы сӥзем альбомъёс но тупатэмын. Лидия Ивановналэн нуналъёсыз та югыт, бордаз кыскись «дуннеын», книгаос пӧлын ортчо, уго со ваньмон дырзэ но ужезлы сӥзе, шуыны луоз. «Мынам хоббие – со компьютер. Интернетысь мон ужам кулэ луись, пайдаё информациос шедьтӥсько. Соосты огазеяса, герӟаса, аслэсьтым малпанъёсме ватсаса, ужрадъёс дасясько», - вера Л. И. Насипуллина. Сюлмаськонъёссэ но библиотекарь вераз: удмурт кылын художественной книгаос, пе, туж ӧжыт, выльёсыз уг берто.
Бадӟым Качак гуртэ Лидия Ивановна кыдёкысь Хайбулла ёросысь вуэмын.
- Мон вордӥськи Выль Зирганын, удмурт гуртын, нош будӥ, дышетски Акъярын. Вордӥськем гуртэ сярысь трос тунсыкозэ мадьыны луэ. Калтасы, Янаул ёросъёсысь целинае кошкем удмуртъёс со гуртэ интыяськиллям. Мынам атае вордӥськыса будэмын Бадӟым Качакын, анае – Бадӟым Туганеевоын. Кыдёкын ке но, араз кык-куинь пол вордӥськем палъёсам вуылыны тыршиськом. Анае Акъярын улэ. Со милемыз котьку чидатэк вите, - вера Лидия Ивановна. – Нош мон кызьы Бадӟым Качаке вуи шуоды? Мон татчы куное лыктӥ вал. Озьы Юралы бызи. 1987-тӥ арысен ни мон Бадӟым Качакын улӥсько.
Лидия Ивановна пӧраськыны-пыжиськыны туж яратэ, гуртысьтызы «Зангари» ансамбле пыриське. Быръёнъёсын со - воштонтэм адями. Дас вить ар ӵоже ни Лидия Ивановна участокысьтызы быръён комиссилэн кивалтӥсез луэ. Котькуд уж борды мед басьтӥськоз, со одно ик быдэстоз, йылаз-пумаз вуттоз.
Калтасы ёрос.
Читайте нас в