-16 °С
Лымы
Антитеррор
Вань иворъёс
Общество
22 февраль 2018, 12:12

Афганистан – висёнмы но куректонмы

Асьмелэн солдатъёсмы Афганистанын 1979-тӥ арысен 1989-тӥ арозь - 9 ар, 1 толэзь но 19 нунал - ожмаськизы. Кин ке но со мурт музъемын лулзэ сётӥз. Нош дор палъёсазы берытскемъёс, оже быремъёсты котьку буре ваё.

Асьмелэн солдатъёсмы Афганистанын 1979-тӥ арысен 1989-тӥ арозь - 9 ар, 1 толэзь но 19 нунал - ожмаськизы. Кин ке но со мурт музъемын лулзэ сётӥз. Нош дор палъёсазы берытскемъёс, оже быремъёсты котьку буре ваё.
Кылем арняын Бадӟым Качак школаын покчи классъёсын дышетскисьёслы «Афганистан – наша память и боль» литературно-музыкальной композиция радъямы. Со асьме войскоосты Афганистанысь поттэмлы 29 ар тырмонлы сӥземын вал.
Бадӟым Качак гурт поселениысь афган оже пыриськиллям Виталий Тимиртдинович Абдуллин, Сергей Сайфутдинович Зайруллин, Юрий Хасанъянович Хабибзянов. Жаляса верано, Виталий Тимиртдинович ожын бырыны шедем. Ужрадэ ми солэсь агайзэ Фамитдин Абдуллинэз но 1979-1981-тӥ аръёсы боевой ужъёсъя ветеранэз Сергей Сайфутдиновичез ӧтимы. Нылпиослы «Афганистан» презентаци возьматӥмы. Асьсэ улонзы сярысь малпаськытэк, нуналлы быдэ воинъёс-интернационалистъёс террористъёс киысь афган нылпиосты, нылкышноосты мозмытъяллям.
Фамитдин Тимиртдинович синвуаськыса пиналъёслы мадиз, кызьы солэсь вынзэ ожысь цинк гробен ваемзэс. Виталий Тимиртдинович кулэмез бере «Горд Кизили» орденэн данъямын. Солэсь нимзэ нуллэ милям школамы. Солэн нимыз сётэмын Качкин-Турайысь одӥгез ульчалы, кытын со вордӥськиз но будӥз.
Сергей Сайфутдинович Афганистанын луэм учыръёсыз сярысь вераз, кышкыт минутъёссэ тодаз ваиз. Пиналъёс сое туж сак кылзӥзы. Соос валазы, кыӵе секытлыкъёс пыр потӥллям войнае вуылэм адямиос.
Афган оже быремъёсты буре вайыса, 2-4-тӥ классъёсын дышетскисьёс «Птицы белые», «Россия – огромная страна», «Наша армия» кырӟанъёсты быдэстӥзы, эктонъёс возьматӥзы. Та пумиськон нылпиослэн малпанъёсазы кема улоз. Табере соос тодӥзы: чиданлык, ас шаердэ гажан юртто тушмонэз вормыны, герой луыны.
Марина КАМАЛОВА, покчи классъёсты дышетӥсь.
Калтасы ёрос.