-23 °С
Яркыт
Антитеррор
Вань иворъёс
Общество
16 февраль 2018, 11:34

«Мынам пытьые музъем вылэ кылёз»

Зӥбыт сямо удмурт воргорон. Таӵеен син азямы пуксе тодмо гожъясь, шаерчи, «Ошмес» газетлэн нырысетӥ валтӥсь редакторез Андрей Васильевич Гильмаев. Кылем арын солы 80 арес тырмысал. Но, жаляса верано, секыт висён Андрей Васильевичез дырызлэсь вазь улонэн люкиз. Озьы ке но дано гожъясь котьку пӧламы: со улэ малпанъёсамы, дорамы берытске пӧртэм веросъёсыз, новеллаосыз но мукет жанрен гожтэм ужъёсыз пыр.

Зӥбыт сямо удмурт воргорон. Таӵеен син азямы пуксе тодмо гожъясь, шаерчи, «Ошмес» газетлэн нырысетӥ валтӥсь редакторез Андрей Васильевич Гильмаев. Кылем арын солы 80 арес тырмысал. Но, жаляса верано, секыт висён Андрей Васильевичез дырызлэсь вазь улонэн люкиз. Озьы ке но дано гожъясь котьку пӧламы: со улэ малпанъёсамы, дорамы берытске пӧртэм веросъёсыз, новеллаосыз но мукет жанрен гожтэм ужъёсыз пыр.
Кылем арняын Татышлы ёросысь Выль Татышлыын БР-ысь удмуртъёслэн национально-культурной центрзылэн уж планэзъя, Андрей Васильевич Гильмаевез буре ваён ӝыт ортчиз. Отчы писательлэн ӵыжы-выжыосыз, эшъёсыз, Янаул но Калтасы ёросъёсысь делегациос, «Ошмес» газетын ужасьёс, БР-ысь удмуртъёслэн НКЦ-зылэн Кенешезлэн ёзчиосыз но тодмоосыз пыриськизы. Со сяна, буре ваён ӝытэ вуизы на Татышлы ёрос газетлэн азьвыл валтӥсь редакторъёссы Рим Ахметов, Марат Зиятдинов, Дарвин Ибатуллин но редакциын Андрей Васильевичен ӵош ужам эшъёсыз Ляля Ибатуллина, Рафаэль Харисов, Таскира Туктарова, Сакина Исанбаева но Любовь Гайнуллина.
Дано гожъясез Татышлы ёросысь Уразгильды гурт будэтӥз. Татысь ульчаос солы вордскем шаерзэ гажан, соин данъяськон мылкыд пыӵатӥзы. Витетӥ классысен Андрей Гильмаев Вылысь Татышлыысь нырысетӥ номеро школаын дышетскыны кутскем. Ӵапак татысен ик, куатетӥ классэ выжемез бере, солэн нырысетӥ кылбурез вордӥськем. Зэм, Андрей Васильевич соку чик ӧз малпаськы, вылды, школа парта сьӧрын кылдэм чуръёсыз бадӟым литератураозь вуттозы шуыса. Но солэн гожъяськон мылкыдыз пумен пуромыны кутскем. Солдат дӥськут дӥсямез бере но Андрей Гильмаев гожъяськем. Со «На страже Родины» газетлэн военной корреспондентэз вылэм. Буре ваёнын Андрей Васильевичлэн литературае нырысетӥ вамышъёсыныз тодматыса вераз ужрадэз дасясь но нуись Анита Зидымакова. Нош собере быдэс зал тыр люкаськем калык пӧлы ачиз писатель вуиз кадь. Учкисьёсты Уразгильдыысь шаертодонъя музейын ортчем ужрадэн тодматӥзы. Шумпотымон, Андрей Васильевичез соку видеое уськытӥллям. Туннэ со шаертодонэн герӟаськем ужын бадӟым инты басьтэ.
Вераны кулэ, Андрей Васильевичлэн небыт куараез, тросэз сямъёсыз быдэсак пиезлы выжемын. Владислав туннэ Уфаын улэ но ужа. Со Казаньысь университетэз йылпумъямез бере геолог луыса тырше. Атайзэ буре ваёнлы сӥзем ужрадэ со нырысьсэ пыриськыны быгатӥз.
Соин, вылды, сюлэмыз шумпотонэн тырмемын вал. Владислав Андреевич трос тодэ ваёнъёсыныз люкиськиз.
Буре ваён ӝытын газетмылэн нырысетӥ редакторез сярысь трос шуныт кылъёс чузъяськизы. Нош тужгес дуноез тодэ ваёнъёс герӟаськемын вал Андрей Васильевичлэн кузпалыныз – Марзия апаен. Соослэн улон сюрессы 1962-тӥ арын герӟаськем. Марзия апайлэн кылъёсызъя, Андрей Васильевич соку ик шӧдэ ни вылэм кужымзэ. «Мынам пытьые музъем вылэ кылёз», - шуэм соку егит гожъясь. «Солэн кылъёсызлы мон соку бадӟым саклык ӧй висъя. Аръёс ортчыса гинэ со сярысь малпаськыны кутски», - вера Марзия апай. Андрей Васильевич кузпалыныз одӥг пи но кык ныл будэтӥзы. Писатель соосты котькудзэс гожтэм чуръёсаз пӧртэм геройёсыз пыр возьматыны быгатӥз. Та нуналэ но Андрей Гильмаевлэн тросэз геройёсыз «улӟизы». Гожъясьлэн веросъёсысьтыз люкетъёссэ Вязовкаысь, Выль Татышлыысь, Калмиярысь, Кызыл-Ярысь, Уразгильдыысь лыдӟисьёсыз возьматӥзы. Со сяна, сцена вылысен Андрей Гильмаевлэн «Выль нянен» кылбурезъя гожтэм кырӟан (крезьгурез Виталий Самигуловлэн) чузъяськиз на.
Андрей Васильевич удмуртъёс пӧлын гинэ ӧвӧл, бигеръёс, ӟучъёс пӧлын но паськыт тодмо. Солэн веросъёсыз, этюдъёсыз, новеллаосыз лыдӟисьёс доры пӧртэм кылъёсын вуизы. Соос нимысьтыз книгаосын сяна, республикаямы, Удмурт Элькунын потӥсь газет-журналъёсын но печатласькизы. Зэм, пӧлазы ӧжыт ӧй вал шаертодонлы сӥзем материалъёс но. Андрей Гильмаев удмурт калыкен но гуртъёсын, соослэн историенызы герӟаськем ужъёсты быдэстонлы бадӟым саклык висъяз. Со сярысь ужрадын Вылысь Татышлыысь шаертодонъя музеен кивалтӥсь А. Н. Шарифьянова но вераз. Нош улосчимы, Удмурт Элькунысь тодмо писатель У. Ш. Бадретдинов писательлэн творчествоеныз паськытгес тодматӥз. Историяя но культурая центрен кивалтӥсь И. М. Самигулова А. В. Гильмаевлэсь нимзэ пӧламы утён понна вань кужымзэ сётыса тыршись А. Д. Зидымаковаез Тау карон гожтэтэн пусйиз. «Азьланяз Уразгильдыысь одӥгезлы ульчалы дано улосчимылэсь нимзэ сётыны чакламын. Солэн нимыз котьку гурт калыкез, пиналъёс пӧлын мед улоз шуыса», - вераз Анита Дельмухаметовна. Со сяна, та нуналэ куноос мукет малпанзэс но усьтӥзы: Вылысь Татышлыысь но одӥгезлы ульчалы солэсь нимзэ, пе, сётоно. Андрей Гильмаев удмуртъёслэн гинэ ӧвӧл, пӧртэм калыкъёслэн данъяськымон адямизы.
Ольга НИГАМАТУЛЛИНА.
Читайте нас в