Жингрес куараос уг чалмо, гуртын улӥсьёс уг мӧзмо

- Нылпиосын ужаны тунсыко. Соос котьку татчы шумпотыса ветло. Репетиция ку луэ шуыса юало, - вера 18 ар ӵоже клубен кивалтӥсьын тыршем Надежда Кусниярова. – Пичиослэн коллективзы (татчы 1-3-тӥ классъёсын дышетскисьёс ветло) сцена вылэ но уг тэры. Семьяысь апай-апоген, агай-вынэн ветлӥсьёс но вань. Гуртамы нылпиос трос. Пинал семьяосмы но ӧжыт ӧвӧл. Соос пӧлысь тросэз парсь вордон комплексын - «Мичуринский» ООО-ын - тыршо. Егит кузпалъёс выль улон юртъёс ӝуто, кык-куинь нылпиос будэто.

Надежда Григорьевна дорысь нылпи садысь пичильтыкъёсты но пумитаны луэ. Соос но татчы «ужаны» вуыло. Тыршемзылэсь емышъёссэс сцена вылын возьмато. Надежда Григорьевна гуртысь библиотекарен Олеся Скрынникен валче ужало. Нылпиосты ужрадъёсы ӵошен дасяло.

Гурлась нылпи дуннеез ӝыт арлыдоос – «Азвесь гур» ансамбле ветлӥсьёс - вошто. Татчы пенсиын шутэтскись но парсь вордон комплексын ужась нылкышноос пырисько. Дас тямыс ар ӵоже фольклор ансамбле ветлӥсьёс вошъяськизы ке но, туннэ нуналэ Накия Садыкина, Какима Меншакирова, София Кусниярова, Рамзиля Куснимарданова, Надежда Гафиуллина, Раина Шакирьянова, Альфира Нуриева, Наталья Гафиуллина, Зинира Меншакирова, Ирина Хамидуллина, Светлана Гильманшина, Лилия Гадиятова учкисьёслы задор мылкыд кузьмало. Кыӵе коллектив арганчитэк? Гуртысь кырӟась-эктӥсьёсты крезьгурен Максим Гафиуллин шулдыртэ. «Котькуд коллективлы арганчи кулэ. Со ужрадмес узырмытэ. Арганчимылы тау кылъёсмес вераськом», - вера ансамблен кивалтӥсь Надежда Кусниярова. – «Азвесь гур» ансамбльмы пӧртэм праздникъёсты шулдыртэ. Гуртамы сяна, ми регионъёс куспын ортчись «Чакара» фестивале шумпотыса пыриськиськом, Татышлы ёросын ортчись ужрадъёсы вуылӥськом. Туэ шуд усиз Татарстанысь Менделеевск ёросын ортчись гырон быдтонын шулдыръяськыны».

«Азвесь гур» ансамбль удмурт калыклэсь лулчеберетсэ уте. Со песянай-песятайёслэсь выжем сям-йылолъёссэс «улӟытэ» но соосты пиналъёслы пыӵатыны сюлмаське. Озьы азвесь гуръёс «Куно ӧтчан», «Сюан», «Нуны сюан» но мукет йылолъёсты возьмато.

Лулчеберет удысын ваньмыз умой кадь. Но Надежда Григорьевнаез ужан юртсы сюлмаськытэ. «Зданимылы 50 ар тырмемын ни, - шуэ со. - Ремонт ортчытысалзы ке, эшшо но бадӟым мылкыдын ужасалмы. Коллективъёсмы но ӧй бырысалзы».

Марина НИКОЛАЕВА.

Янаул ёрос.