Урамъёсты тупатыны кенешизы

Вераны кулэ, улысь балтачъёс та проектэ 2016-тӥ арысен пырисько, ужан амалъёсты соос ӟеч тодо, шуыны луоз. Собраниын гурт урамъёсты тупатыса быдтыны кенешизы (собрание 132 адями пыриськиз): зоро дыръя Новая, Набережная, 50 лет Октября урамъёстӥ ортчыны уг луы. «Малпанмы мед быдэсмоз шуимы ке, асьмелы ӵошен кариськыса ужано. Конкурс пыр ортчон понна, трос баллъёс люкано», - вераз Эдуард Бурханович.

Собранилы дасяськыса, улысь балтачъёс сюресъёсты тупатонлы сӥзем трос плакатъёс дасяллям. Школаын дышетскисьёс пӧлын «Мынам ульчае» суредъёсъя конкурс радъяськем, культура юртлэн фойеяз пиналъёслэн суредъёсынызы адӟытон дасямын вал. Собраниын дас адямилэсь сылӥсь инициативной группа бырйизы, котькуд юртысь сюрс манетэн коньдон люканы вераськизы.

* * *

Бурай ёросысь Касиярово гуртын но ППМИ-лы сӥзем собрание ортчиз. Калыкен пумиськонэ ёрос Кенешлэн секретарез Гемир Нуртдинов но Бурай ёрос администрацилэн финансъёсъя управлениеныз кивалтӥсь Альфида Дюсьметова пыриськизы. Кенешонын тодмо луиз – касияровоос но гурт урамъёссэс тупатон сярысь сюлмаськонъёсын уло вылэм. Соос Школьная, Луговая, Юбилейная но Журавлиная урамъёссэс лэсьтыны кенешизы.

-Умой сюресъёс котькудмылы кулэ: гуртоослы но, палэнын улӥсь нылпиосмылы, матысьёсмылы но. Конкурсэ пыриськыса коньдон басьтыны луонлык вань дыръя, соин одно ик пайдаяськоно. Оскиськом, Касияровоын вордӥськыса будэм, али городъёсын улӥсьёс но юрттэт кизэс мычозы. Проект озьы малпамын – спонсор юрттэт возьматӥсьёс ке луизы, баллъёс но тросгес люкасько. Ӵошен гурезез но берыктыны луэ, шуо. Та уж борды но ӵошен басьтӥським ке, ваньмыз пӧрмоз, - малпанъёссэс веразы касияровоос.

Конкурсын вормон утӥзы ке, инициативной группа котькуд юртысь куинь сюрс манетэн коньдон люкано луоз.

Миляуша БУЛАТОВА.