«Быдэстоно ужлэн ӟечлыкезлы саклык висъян – валтӥсь ужпуммы»

Бадӟым букваен Дышетӥсь

Инзиля Ворончихина улонэзлэсь куамын одӥг арзэ дышетон ужлы сӥзем. Нылпиосты визьнодан солэн сюлмаз пыраклы каръяськем Можга педучилищеез йылпумъямез бере, 1981-тӥ арын.

- Нырысетӥ классэ дышетскыны пырем дырысен мынам одӥг гинэ малпанэ вал – дышетӥсь луыны. Мукет удыс быръён сярысь ноку ӧй малпаськы. Педучилищеез йылпумъям бере, направлениен Глазов ёросысь Вылӥ Парзи селое ужаны ыстӥзы. Отысен кутскиз уж сюресэ – покчи классъёсты дышетӥ, - вера Инзиля Фанисовна. - Вылӥ Парзи школаын сизьым ар гинэ ке но дышетӥ, со аръёс туннэ кадь син азям. Туж тупаса, тыршыса ужамы дышетӥсьёсын. Али но со палъёсы вуылыку, шумпотыса пумиськиськом.

Палэнын егит дышетӥсьлэн семьяез ке но кылдэ, со вордӥськем шаерезлэсь туж мӧзме. Геннадий кузпалыныз кенешыса, 1988-тӥ арын Ворончихинъёс Инзиля Фанисовналэн вордӥськем гуртаз – Максиме – улыны берто. Вылӥ тодэмо дышетӥсез (Инзиля Фанисовна заочно Глазовысь пединститутын начфакын дышетске) Максим шор ёзо школае шумпотыса ужаны басьто. Озьы ортче кызь ньыль ар.

Нырысетӥ классэ лыктэм пичиосты Инзиля Фанисовна вань сюлэм шунытсэ сётыса дышетэ, ноку куаразэ но уг ӝуты. «Нылпиос школае шумпотыса мед лыктозы, ваньзэ мед валалозы шуисько вал», - вера И. Ф. Ворончихина. Ужзэ гажась, нылпиосты яратӥсь дышетӥсьлы школа кыкетӥ юртэз кадь луэ.

Инзиля но Геннадий кузпалъёслэн кык нылпиоссы. Оксана нылзы аслаз семьяеныз Москваын улэ, соослэн пичи пизы будэ. Нош Денис пизы – вӧзазы. Ворончихинъёс ӵош одӥг коркан тупаса уло. Инзиля Фанисовна али нунокъёсыз вӧзын. Вань дырзэ но сюлэм шунытсэ со Викторияен Роландлы кузьма. Внучкаез кык аресаз ик букваосты тодэ вылэм ини. Виктория песяезлы шумпотыса книгаос лыдӟе. «Пичиосын нуналлэсь ортчемзэ но шӧдытэк кылиськод вылэм. Песяй, ӵужай луэм бере валай, тужгес бадӟым шуд – со внукъёс», - шуэ Инзиля Фанисовна.

Ужам аръёссэ, дышетэм нылпиоссэ но ужысь эшъёссэ пенсиысь дышетӥсь шуныт мылкыдын тодаз вае. Дышетэм нылпиосыз но сое уг вунэто, арлы быдэ Дышетӥсьлэн нуналаз сяська керттэтъёсын дораз вуо. Дырын-дырын арлыдо дышетӥсь ужакуз дасям портфолиозэ учкылэ. Отын Инзиля Фанисовналэн быдэс уж сюресэз «улэ». Ортчытэм ужрадъёсызлэн сценариосыз, пӧртэм-пӧртэм ужрадъёсысь туспуктэмъёс, усьтэм урокъёсызлэн конспектъёсыз, дышетскисьёсызлэн утэм грамотаоссылэн но дипломъёссылэн копиоссы, газет бамъёсын печатласькем материалъёс – ваньмыз ӝикыт возиське. Вераны кулэ, Инзиля Фанисовна покчи классъёсты дышетэмез сяна, удмурт кылъя но литературая урокъёсты но нуэм, куать ар ӵоже школаен кивалтӥсьлэн воштӥсез вылэм. Дышетӥсьлэсь тыршись луэмзэ портфолиоысь данъян грамотаос, тау карон гожтэтъёс но возьмато.

Ужедъя - данэд

2013-тӥ арын толшор толэзе Ворончихинъёслэн семьязы ужбергатон удысэ вамыштэм: пластик укноос лэсьтыны кутскиллям.

- Кызьы калыкын шуо, кутскем ужед пайдаё мед луоз шуон понна, со ужлы аслыд пыр-поч дышетсконо. Милям озьы ик луиз, шуыны луоз, - вера Геннадий Николаевич. – Ми Денис пиеным нырысь пластик укноос лэсьтон удысын ужамы. Уж ӵектӥсьмылэн ручной станокъёсыз гинэ вань вал. Одӥг укноез лэсьтон понна трос дыр ке но быдтӥськом, укно лэсьтыны курыса вазиськисьёслэн лыдзы трос луылӥз.

- Огдыре милям йырамы малпан кылдӥз – асьме дорын пластик укноос лэсьтон цех усьтыны, - азьланьтэ Денис. – Кӧня ке коньдон люкаса, ми но ручной станокъёс басьтӥм. Ужмы со бордысен кутскиз. Нырысь атаен кыкнамы ужамы, собере кык ужасьёсты басьтӥм. Туннэ нуналэ ми дорын ньыль адями ужа.

Улон интыяз уг сылы. Котькыӵе удысэз басьты, арлы быдэ мар ке но вылез «вордӥське». Пластик укноос тупатонын но озьы ик. Ваньзэ соосты егит ужбергатӥсь эскерыса улэ. «Выль технологиос кылдэмъя, куронъёс но йыло, будо. Эскеронъёсын но дорамы ӵем вуыло. Ваньмыз каньыл шуыны уг луы, шуг-секытъёсын пумиськылӥськом. Котькуд ужлэн аслаз секытлыкъёсыз, дыр», - шуэ Денис Ворончихин.

Кутскем арзэс туннэ нуналэн ӵошатоно ке, Ворончихинъёс трослы азьпала вамыштэмын. Ужан интызэс но соос бадӟыматӥллям, ужзэс капчиятон вылысь, выль станокъёс но басьтӥллям. Соосты Янаул ёросын гинэ ӧвӧл, бускель ёросъёсын но умой тодо, бадӟымесь проектъёсын вормисьёс но соослы укноос тупатыны курыса вазисько. Кылсярысь, «Реальные дела» проект улсын, Шудек школалэсь но Вылысь Барабановка клублэсь укнооссэс воштӥзы. Со ужъёсты Ворончихинъёс быгатыса быдэстӥзы. «Татышлы ёросысь Калмиярын фермазэс тупатӥзы. Отчы укноос ми лэсьтӥм-пуктылӥм», - вера Геннадий Николаевич.

Азьло Ворончихинъёслэн заказъёссы ӧжытгес ке вылэм, туэ трослы, пе, йылӥз. Соос Янаулын асьсэлы офис усьтӥзы. Отын Денислэн Юлия кузпалыз ужа.

- Арлы быдэ ужан технологиос воштӥсько. Витражной укноос лэсьтыны курыса вазиськисьёс но трос. Адямиослэсь куронзэс быдэстытэк уг луы. Туэ стеклопакетэн ужан станоклы узырмим. Котькыӵе ужан тӥрлыкен мед пайдаяськомы, милям валтӥсь ужпуммы – быдэстоно ужлэн ӟечлыкезлы саклык висъян, - шуо Ворончихинъёс.

Ужзэс соос ньӧмыз понна гинэ уг быдэсто. Максимын укно лэсьтытэм муртъёс Ворончихинъёслэн ужзылы вылӥ дунъет сёто. Соин ик «Окна «Максим» офисэ вазиськисьёс трос. Азьпалан но озьы ик луоз. Калыкын тодыса вераллям: ужедъя – данэд.

Миляуша БУЛАТОВА.

Янаул ёрос.

Туспуктэмъёсыз Алексей САМИРЗЯНОВЛЭН.