-15 °С
Яркыт
Антитеррор
Вань иворъёс
Общество
7 декабрь 2017, 14:27

Кызьы улон интыдэ выжыкыл дуннелы пӧрмытоно?

КЫЗЬЫ УЛОН ИНТЫДЭ ВЫЖЫКЫЛ ДУННЕЛЫ ПӦРМЫТОНО?

Та юанлы валэктон шедьтӥ Янаул ёросысь Барабановка гуртэ вуыса. «Аслад киосыныд!» - шуэ татын улӥсь Артём Исрафутдинов. Со понна кӧня ке фантазия, вакыт но тыршем гинэ кулэ вылэм. Артём Витальевич гурт пуме, улон юртсы вӧзы, нылпиослы шудон площадка тупатэм.
- Гужембыт гуртысь нылпиос та площадкаын шудӥзы. Макем бадӟым шумпотон луиз со пичиос понна, - вера Сандугач гурт поселенилэн администрациеныз кивалтӥсь Тимирзян Шаримзянович Куснияров.
Кызьы, пе, уз шумпотэ? Маиз гинэ шудон площадкаын ӧвӧл! Ӟечыранъёс, нискылан гурезь вӧзы пальмаос «ӝужаллям», огпалангес шунды «мыня», лызгырлыос, тӧдьысяськаос, губиос, кыз но татын «будо». Мультфильмысь Лунтик но татчы «вуэм». Гудӟемлы но инты шедем. Машинае но пуксьыса шудыны луэ. Тунсыко попугай но нылпиосты шумпотыса «пумита»…
- Кызьы шудон инты лэсьтыны малпанды кылдӥз, - юасько Артём Витальевичлэсь.
- Нелли нылмы ӟечыран лэсьтыны куриз. Со бордысен ваньмыз кутскиз. Кузпалыным кыкнамы тупатъямы, - вера А. Исрафутдинов.
Ужазы кузпалъёс пластик бутылкаосты, питранлэсь шинаоссэ трос кутӥллям, сяськаоссэс пулэсь лэсьтэм горшокъёсы интыяллям. Чебересь буёлъёсын пайдаяськыса, зэмос выжыкыл кылдытӥллям.
Миляуша но Артём Исрафутдиновъёс парсь вордон комплексын - «Мичуринский» ООО-ын - ужало. Артём Витальевич дробильной цехын операторын тырше, нош кузпалыз мумы парсьёсты уте. Уждурысьтызы соос жадьыса ке но берто, Нелли нылзылы но Никита пизылы трос дырзэс висъяло. Анай-атайзы ужысь бертытозь, пичиос - песяен песятайзы вӧзын. Хакима апай но Дамир агай нунокъёссэс вань сюлэм шунытсэс сётыса утялто. Исрафутдиновъёс ӵошен тупаса уло.
Кибашлы семья толалтэ но нылпиос понна мар ке но тунсыкозэ лэсьтон сярысь сюлмаське. Исрафутдиновъёслэн капка азьысьтызы Тол бабаез, Лымы нылэз, выжыкылысь пӧртэм-пӧртэм пӧйшуръёсыз адӟыны луэ. Лымы мунё лэсьтыны бадӟымъёсын ӵош сизьым аресъем Нелли но потэ. Кык аресъем Никита выныз но сьӧрысьтыз уг кыльы.
Читайте нас в