-17 °С
Салкым
Антитеррор
Вань иворъёс
Общество
10 ноябрь 2017, 13:17

Со гожъяськытэк улыны ӧз быгаты

Сизьыметӥ шуркынмон. Совето Союз вакытэ та нунал календарьын горд тусэн луэ вал – Октябрь революцилы сӥзем праздник. Туэ Октябрь революциез пусйыны кутскем дырысен 100 ар тырмиз. Быдэс даур ортчемын. Со дыр ӵоже дунне вылэ кӧня адями вордӥськем, шаермылэн историяз кӧня адями пытьы кельтэм, кӧня ӟеч ужъёс быдэстэмын!Туннэ нуналлэн героез – шаермылэн одӥгез дано пиез. Со - Башкортостанысь культура удысысь сӥё-дано ужась, Удмуртиысь писательёслэн союззылэн ёзчиез, тодмо журналист Андрей Гильмаев. Андрей Васильевичлы 6-тӥ шуркынмонэ 80 арес тырмысал. Жаляса верано, со пӧламы ӧвӧл ни. Андрей Васильевич малпанъёсамы улэ, солэн ужъёсыз тодэ ваёнъёсамы возисько.

Сизьыметӥ шуркынмон. Совето Союз вакытэ та нунал календарьын горд тусэн луэ вал – Октябрь революцилы сӥзем праздник. Туэ Октябрь революциез пусйыны кутскем дырысен 100 ар тырмиз. Быдэс даур ортчемын. Со дыр ӵоже дунне вылэ кӧня адями вордӥськем, шаермылэн историяз кӧня адями пытьы кельтэм, кӧня ӟеч ужъёс быдэстэмын!
Туннэ нуналлэн героез – шаермылэн одӥгез дано пиез. Со - Башкортостанысь культура удысысь сӥё-дано ужась, Удмуртиысь писательёслэн союззылэн ёзчиез, тодмо журналист Андрей Гильмаев. Андрей Васильевичлы 6-тӥ шуркынмонэ 80 арес тырмысал. Жаляса верано, со пӧламы ӧвӧл ни. Андрей Васильевич малпанъёсамы улэ, солэн ужъёсыз тодэ ваёнъёсамы возисько.
Андрей Гильмаев дышетӥсьёслэн семьяязы вордӥське. Атаез, Быдӟым Атыкай ожысь ветеран, быдэс уж сюрессэ Татышлы ёросысь Уразгильды школалы, нылпиослы тодон-валан сётонлы сӥзе. Школаез йылпумъям бераз, Андреез но улон сюресэз педагогикая училищее вуттэ. Дышетсконзэ умой йылпумъяса, со ёросэ ужаны бертэ. Андрей Васильевич Бигиней шор ёзо школаын историяя урокъёсты нуэ. Собере егит дышетӥсез армие басьто, служба аръёсыз Дальний Востокын ортчо. Солдат вордӥськем палъёсаз берытске но уж сюрессэ Бигиней школаын ик азинтэ. Егит дышетӥсьлэн одӥг малпанэз луэ, кудӥныз со ноку уг люкиськылы – дышетсконзэ азинтэмез потэ. Озьы со Удмурт кун педагогикая институтэ дышетскыны пыре, историяя факультетэз йылпумъя. Андрей Васильевич яратонзэ Арибаш гуртысь пумита. Марзия Шартдиновнаен соос семья кылдыто. Кузпалъёслэн пизы вордӥське, сое Вячеслав нимало.
1967-тӥ арлэн пумыз. Ёрослэн Янаулысь берен Татышлые берытскем дырыз вал со. Андрей Васильевичез КПСС-лэн райкомаз вазьыса, политпросвещениея кабинетэн кивалтӥсе но «Знание» огазеяськонэ валтӥсь секретаре юнмато. Озьы Гильмаевъёслэн семьязы ёрос центре улыны выже. Кузпалъёслэн Наталья но Лариса нылъёссы вордӥсько. «Нылпиосмы куиньназы но туж визьмоесь луыса будӥзы, тыршыса, умой дышетскизы», - вера Марзия апай.
Вячеслав Казаньысь федерал университетын геологияя факультетын дышетскыса, Башкортостанэ ужаны берытскиз. Сизьым арлы матэ Россиысь тодосчиосын ӵош Монголиын ужаз. Гильмаев кузпалъёслэн нылъёссы но вылӥ тодон-валан басьтон юртъёсын дышетскизы. Наталья Уразгильды школаын дышетэ, Лариса – Вылысь Татышлыысь нырысетӥ номеро школаын. Соослэн котькудзылэн семьяоссы вань. Марзия апайлы соос котьку юрттӥськыса уло.
Сизьымдонэтӥ аръёслэн кутсконазы Андрей Васильевич редакциын ужаны кутскиз. Со «Коммунизме» Татышлы ёрос газетлэн редакторезлэн воштӥсез вал. Собере газетлэсь нимзэ воштӥзы, со «Азьлань» нимаськыны кутскиз. Журналистикаен ӵош, Андрей Васильевич писательлэсь ужъёссэ но быдэсъяз. Со гожъяськытэк улыны ӧз быгаты. Солэн ужъёсыз Удмуртиын потӥсь газет-журналъёсын но печатласькизы.
Укмыстонэтӥ аръёсы шаерын пӧртэм воштӥськонъёс луизы. Андрей Васильевич ас калыксэ, анай кылзэ утён сярысь но сюлмаськыны кутскиз, удмурт эшъёсыныз ӵош трос ужрадъёс радъяллязы. Башкортостанысь удмуртъёслэсь огазеяськонзэс кылдытонэ но со трос кужымзэ понӥз. Удмуртъёслэн НКЦ-зы «Дэмен» хозяйстволэн музъем вылаз интыяськиз. Солэсь ужзэ азинтонэз хозяйствоен кивалтӥсьлы Ренат Галямшинлы оскизы. Солэн ужаз Андрей Васильевич но бадӟым юрттэт возьматӥз. Со дыре удмуртлыкез ӝутон, калык сям-йылолъёсты утён вылысь туж трос ужъёс быдэстӥськизы. Соос пӧлысь тужгес пусйымонэз – республикаямы «Ошмес» газет потыны кутскиз. Отчы валтӥсь редакторе Андрей Васильевичез юнматӥзы. Выль ужез азинтон трос кужымез, дырез кулэ кариз. Андрей Васильевич удмурт газетлэсь ӧрзэ паськытатон вылысь сюлмысьтыз тыршиз: лыдӟисьёслэн лыдзы арысь аре йылӥз.
Андрей Васильевич – ньыль книгаослэн «атайзы»: «Кема пиштӥсь укноос» (1982), «Улонлэн пушъетъёсыз» (1989), «Вакытъёслэн гердзы» (1994), «Пумиськонъёс но люкиськонъёс» (2004). Солэн огъя 70-лэсь трос веросъёсыз пӧртэм газет-журналъёсын печатласькизы. Произведениосыз ӟуч, бигер, башкир, пор но коми кылъёсы берыктэмын. Ёросамы но солэн палэназ улӥсьёс Андрей Васильевичлэсь шаерез эскеронэн тунсыкъяськемзэ но ӟеч тодо. Писатель ас азяз валтӥсь ужпум пуктылӥз – анай кылэз утёно, калык сямъёсты улӟытоно. Андрей Васильевич ми понна адӟем карымон, данъяськымон адями луиз. Интыед небыт медло, Андрей Васильевич.
Рафаэль ХАРИСОВ.