Огкылысь луон - асьмелэн узырлыкмы

Кылем арняын шоркарамы республикаысьтымы калыкъёслэн кусыпъёссы сярысь бадӟым вераськон ортчиз. Отчы Башкортостан Республикалэн Тӧроез Рустэм Хамитов но пыриськиз.

Башкортостан Республикалэн Тӧроезлэн верамезъя, шаерамы калыкъёслэсь эшлыко кусыпъёссэс юнматон понна трос уж нуиське. Башкортостан арлы быдэ пӧртэм конкурсъёсы пыриськыса, федерал бюджетысь коньдон басьтэ. Со сяна, республика бюджетысь но коньдон ӧжыт уг висъяськы.

- Зэм, тросэз национально-культурной огазеяськонъёс калык праздникъёсты, сабантуйёсты, концертъёсты ортчытыны юрттэт курыса вазисько. Туннэ нуналэ туж ӧжыт сыӵе проектъёс, кудъёсыз пӧртэм калыкъёсты бордазы кыскыны быгатысалзы, - вера Рустэм Закиевич. – Тупаса улон – асьмелэн бадӟым узырлыкмы. Сое утён понна вань кужыммес сётоно.

Кенешонын пӧртэм ужпумъёсты ӝутӥзы. Соос дышетонэн, калыклэсь осконзэ утёнэн но трос мукетыныз герӟаськемын вал. «Мон инженер, соин троссэ та удысысь арбериосын ӵошатӥсько. Вань сыӵе металл, химической элемент – корт. Мукет химической элементъёсын сураса, со юнгес, чидасьгес луэ. Асьмелэн улонамы но со выллемгес. Шаерамы улӥсьёслэн 90 процентэз ӟучъёс луо. Нош асьмеос, пӧртэм кылын вераськись калыкъёс, соосын валче улыса, кужмогес луиськом», - вера Рустэм Хамитов.

Республикалэн Тӧроезлэн кылъёсызъя, республикаямы улӥсь котькуд калык данъяськыса вераны быгатэ: «Башкортостан – мынам республикае, мынам шаере. Со асьмелэн синмаськымон чебер музъеммы».

Башкортостанысь калыкъёслэн огкылысь луонзы сярысь вераськон ньылетӥ шуркынмонэ азинтӥськиз «Башкортостан» концерт залын. Та нуналэ отын пӧртэм адӟытонъёс ужазы (удмуртъёслы сӥзем сэрегез историяя но культурая центр дасяз), бадӟым концерт ортчиз. Сцена вылын удмурт кырӟанэз быдэстӥз Татышлы ёросысь Улысь Балтачысь «Ӧрӟи» ансамбль. Ужрадын калыкъёслэн эшъяськон юртэнызы радъям «Мы дружбою сильны» республика конкурслы йылпумъянъёс лэсьтэмын. Отын Улысь Балтачысь Адрияна Шайбаковалэн но Дарья Туктамышевалэн, Бальзюгаысь Данил Кабипяновлэн ужъёссы дипломен пусъемын.

Ольга НИГАМАТУЛЛИНА.