-15 °С
Салкым
Антитеррор
Вань иворъёс
Общество
2 ноябрь 2017, 13:43

Улонзы дуно но чидась из выллем юн

Калтасы ёросысь Вылысь Тыхтем гуртын будэм Зоя но Анатолий Уранбаевъёс вуоно арысь 28-тӥ толшоре бриллиант сюанзэс пусъёзы. Та дуно, чидась из выллем ик Уранбаев кузпалъёслэн но улонзы юн луиз.

Калтасы ёросысь Вылысь Тыхтем гуртын будэм Зоя но Анатолий Уранбаевъёс вуоно арысь 28-тӥ толшоре бриллиант сюанзэс пусъёзы. Та дуно, чидась из выллем ик Уранбаев кузпалъёслэн но улонзы юн луиз.
-Толяен ми одӥг урамын будӥмы. Соос семьяязы сизьым нылпи вал. Но, жаляса верано, али соос пӧлысь ньылез гинэ тазаесь на. Милемыз ог-огмылэсь гоп гинэ люкылӥз, - егит дырзэ тодаз вайыса вера Зоя апай. – Егит дыръям Толяен гинэ эшъяськи. Нош выль кенаклы каб тӧдьыен лушкаса ваизы».
Анатолий Садиахметович егит дыръяз дышетӥсьын ужаны малпа вал. Соин со быръем ӧрезъя Николо-Берёзовкаысь педучилищее тодон-валан люканы пыриз. Дышетсконзэ йылпумъяса, гуртысьтызы но Бадӟым Качакысь школаосын покчи классъёсы ветлӥсь нылпиосты дышетӥз. Татын ужакуз ик армие мыныны ивор вуиз. Куинь ар Анатолий Садиахметович Прикарпатьеын службазэ ортчиз. Нош 1965-тӥ арын со семьяеныз Таджикистанэ улыны выжиз.
- Средней Азиын 27 ар улӥмы, - вера Зоя Валиуллиновна. – Отын шуныт, пӧсь шуизы. Шуныт пала кыстӥським. Улыны Худжанд (азьвыл Ленинабад нимаськиз) городэ интыяськимы. Кузпалы шахтаын электрикын тыршиз. Куинь сменаен ужаллязы. Ужзэ вис карытэк ик Таджик кун университетлэн юридической факультетаз тодон-валан люказ. Нош 1971-тӥ арысен со ужан сюрессэ прокуратураын азинтӥз. Анатолий котьку калык понна зэмлыко ужаны тыршиз. Уждурысьтыз бертыса номырзэ но уз вера вал. Выльысь но выльысь тросгес ӟеч ужъёс лэсьтыны сюлмаськиз.
Ачиз Зоя Уранбаева та вакытэ Таджик республикаысь одӥгаз бадӟым предприятиын – шёлк поттон комбинатын – зарядчицаын тыршиз. Со сяна, ужан сюресэз «Торгмаш» заводэн но герӟаськемын на. Татын Зоя Валиуллиновна кема аръёс ӵоже малярын ужаз.
Улонын воштӥськонъёс кутскемен, 1992-тӥ арын Уранбаевъёс Янаулэ улыны бертӥзы. Та вакытэ Анатолий Садиахметович бадӟым опытэн, трос тодон-валанэн ужась ни вал. Шутэтскыны потытозяз со татысь прокуратураын тыршиз. Та удысын кызь сизьым ар ужамезлэн емышъёсыз - СССР-ысь генеральной прокурорлэн данъян грамотаез, «Россиысь прокуратуралы 290 ар» гадьпус, «Ужысь ветеран» ним но мукет трос вормонъёс. Анатолий Уранбаевлэн лёгем сюресэз соин ӧз пытсаськы. Табере солэсь мытэм ужзэ Нина нылызлэн Александра нылыз азинтэ. Со куатетӥ арзэ ни Нефтекамскысь прокуратураын прокурорлэн юрттӥсез луыса тырше. «Милям семьямы интернациональной, - вера Зоя апай. – Бадӟымез Ира нылмылэн кузпалыз пор, пичиезлэн – ӟуч. Бигер эмеспимы но вань. Ваньзы соос кибашлыесь. Бертыса ужъёсты быдэсак лэсьтыса кельто. Ми куинь внучкаосын, кык внукъёсын но вить правнукъёсын узыр».
Гужемзэ Уранбаев кузпалъёс Вылысь Тыхтемын уло (толалтэлы Нефтекамскысь квартираязы выжо). Гуртын соос трос кроликъёс, чипы-курегъёс вордо. Сӥзьыл бакчазы но кузёоссэ пӧртэм емышъёсын шумпоттэ.
Марина НИКОЛАЕВА.
Калтасы ёрос.
Читайте нас в