«Кырӟан но сяська улонэз шулдырто»

Янаул ёросысь Андреевкаысь Гузалия Губаева мӧзмыны тодӥсьтэм, ужтэк пукыны чидасьтэм, вераськыны яратӥсь кышномурт. Калыкен капчиен огкыл шедьтыны быгатэмез солы улонын но, ужаз но, пе, юрттэ. Кызь вить арлэсь кема ини Гузалия Закиевна гуртысь клубен кивалтэ. Солэсь ужан интызэ пӧртэм-пӧртэм сяськаос шулдырто. Арлэн котькыӵе вакытаз Андреевка клубе лыкты, кивалтӥсьлэн киосыныз утялтэм гулъёсыз сяськаос пӧлын «пыласько». «Кырӟан но сяська улонэз шулдырто», - шуэ клубен кивалтӥсь.

Гузалия апай Андреевкаын бигер семьяын вордӥськем. Удмурт пиналъёсын шудыса будэм бере, удмурт кылын но, бигер кылын выллем ик, туж чылкыт вераське. Со сяна, со пор кылэз но умой тодэ, кузпалыз Валерий Михайлович пор семьяысь потэмын угось.

Гузалия Закиевналэн 40-лэсь трос данъян грамотаосыз люкаськемын. «Кузпалылы бадӟым тау. Со юртъер котырысь вань ужъёсты быдэсъямен, мон клубын ужрадъёсы дасяськисько, ёросын но солэн палэназ радъяськись фестивальёсы, смотр-конкурсъёсы пыриськисько. Со – мынам юн, оскымон тыбыр пыкетэ», - вера Г. Губаева.

Усто кивалтӥсь луэмез сяна, Гузалия апай киужен но вырыны яратэ. Толалтэ со клубын ӵем дыръя ӝыт пуконъёс радъя. «Зангари» калык ансамбле ветлӥсьёс отчы шумпотыса лыкто, ог-огенызы пумиськыса верасько, вашкала удмурт кырӟанъёсты но, пе, быдэсъяло. Андреевкаос клубзэс, «Зангаризэс» Гузалия Закиевнатэк син азязы но пуктыны ум, пе, быгатӥське. Кыӵе гинэ ужрад гуртазы мед ортчоз, отчы дасяськон борды нырысь ик «Зангарие» ветлӥсь арлыдоос басьтӥсько.

Миляуша

НИГАМАТУЛЛИНА.

Янаул ёрос.