-23 °С
Яркыт
Антитеррор
Вань иворъёс
Общество
26 Октябрь 2017, 12:38

Гумырлэн «зарни сӥзьылэз» - нылпиосын артэ

28-тӥ коньывуон – огыр-бугыр азинскись улонлэн пӧртэм-пӧртэм нуналъёсыз пӧлысь тужгес «шунытэз» но «шыпытэз», дыр. Песяен песятай вӧзын котьку каньыл: шуныт кылзэс соос ноку уз жалялэ, небыт куараенызы либатозы, кисыриё киосынызы йырсиез маялтыса, кенешен но юрттозы. Соос вӧзын кыӵе ке но, кылын вераны луонтэм, выжыкыл дунне кузёяське. Россиын песяйёслы но песятайёслы сӥзем нунал 2009-тӥ арысен пусйиське. Символэз но аспӧртэм: та нуналэ внукъёссы но внучкаоссы арлыдоослы укно дурын будӥсь гулъёс кузьмало. Горшокын будӥсь сяська возьматэ – арлыдоос кема улӥллям, соослэн выжызы юн, со выжы арысь аре выль пушъетъёс поттэ – нылпиос вордӥсько, семья бадӟыма.

28-тӥ коньывуон – огыр-бугыр азинскись улонлэн пӧртэм-пӧртэм нуналъёсыз пӧлысь тужгес «шунытэз» но «шыпытэз», дыр. Песяен песятай вӧзын котьку каньыл: шуныт кылзэс соос ноку уз жалялэ, небыт куараенызы либатозы, кисыриё киосынызы йырсиез маялтыса, кенешен но юрттозы. Соос вӧзын кыӵе ке но, кылын вераны луонтэм, выжыкыл дунне кузёяське. Россиын песяйёслы но песятайёслы сӥзем нунал 2009-тӥ арысен пусйиське. Символэз но аспӧртэм: та нуналэ внукъёссы но внучкаоссы арлыдоослы укно дурын будӥсь гулъёс кузьмало. Горшокын будӥсь сяська возьматэ – арлыдоос кема улӥллям, соослэн выжызы юн, со выжы арысь аре выль пушъетъёс поттэ – нылпиос вордӥсько, семья бадӟыма.
«Анай», «тэтэй» - таӵе небыт кылъёсын вазисько нунокъёссы Калтасы ёросысь Вылысь Тыхтем гуртын улӥсь Елена но Василий Камидуллинъёслы. Витьтон кык ар улон сюрес кузя артэ вамышъясь кузпалъёс Валентин пизылэн семьяеныз ӵош уло.
- Анай – со песяймы, тэтэй – песятаймы. Мемимес ми – агае, мон но выны – «мама» шуиськом, - вера кузпалъёслэн внучказы Виктория. – Анаен тэтэй сярысь мон трос но кема мадьыны быгатӥсько. Соос – трос секытлыкъёсты адӟем адямиос. Соин ик котькинэ валаны тыршо, лэся, юрттэт кизэс мычо, соослэн сюлэм шунытсы нылпиоссылы но, нылпиоссылэн нылпиоссылы но тырме. Соос улонлэсь шулдырзэ, котьма бордысь но ӟечсэ гинэ адӟыны-шедьтыны тыршо.
Зэм, кузпалъёслэн улон сюрессы вольыт гинэ луымтэ. Пичи дырзы секыт ортчем, война бере улэмзы сярысь Елена Галяхматовнаен Василий Камидуллиновичлэн тодазы но ваемзы уг поты. Нош кызьы меда соос тодматскиллям? Вася агай Вылысь Тыхтемын вордӥськыса будэм, нош Лена апай – Янаул ёросысь Можга гуртын. «1964-тӥ арын татчы эшелэн сюаназ лыктӥ. Соку монэ Васялы кышнолы лушказы. Одӥг пол адӟиськытэк но семьямы кылдӥз. Озьы гожтэм вылэм, лэся, паръяським, куать нылпи вордӥм, шудо улӥськом», - вера Елена апай. Ачиз нош синкылиоссэ ватыса борддорысь туспуктэм шоры лушкемак учке. «Эшшо но шудо луысалмы, Игорь пимес афган ож ӧй ке басьтысал», - ватса анаймурт.
- Мон понна анай но тэтэй – геройёс. Сютэмлык пыр потӥллям, солдатэ келям пизэс ыштӥллям, озьы но соос чигиськиллямтэ, улонзэс азинтыны тыршиллям, туннэ нуналэ но нылпиоссы понна уло. Ӧжыт шат, кылсярысь, кайгуэнызы сэрен юон сюресэ пыремъёс? Мон данъяськисько соосын. Анаен тэтэй туж тупаса, ог-огзэс яратыса но гажаса уло. Яратонзы соослэн туннэ но сӥямтэ на – огзы шоры огзы туж ненег учко, лякытэн гинэ вазисько. Шумпотӥсько, соос милям вань шуыса, - вера Виктория.
Камидуллин кузпалъёслэн уж сюрессы сярысь верано ке, со гурт удысэн герӟаськемын. Лена апай нырысь колхозын пӧртэм ужъёсты быдэсъям, собере дас куинь ар ӵоже колхозын пӧзьтӥськисьын тыршем. «Столовойын ужанэз туж секыт вал. Ужасьёс трос. Нуналаз 150 адямилы тырмыт сиён пӧзьтылӥмы. Одӥг арын Москваысь ужасьёс командировкае вуизы. Соослы вазь ӵукна но, ӝыт но сиён дасяно вал», - вера арлыдо кышномурт.
Вася агай 30 арлэсь кема сварщикын тыршем. Секыт ужез та нуналъёсы ассэ шӧдытэ, пе. «Синме соку быдтӥ, огез уг адӟы ни», - шуэ со. Пенсие Вася агай витьтон аресаз потэм ке но, со дораз пукыны чидамтэ, куатьтон арес луытозяз гурт хозяйствоын пӧртэм ужъёсты быдэсъям на. Кузпалъёслэсь тыршыса ужась луэмзэс данъян грамотаоссэс учкыса но тодыны луэ. Соос уно люкаськемын.
- Анаен атай милемлы котьку юрттӥсько, юртъер котырысь ужъёсты но соос быдэсъяло. Ми Викторияен клубын ужаськом бере, ужрадъёсы но трос ветлоно луиськом, куддыр республикалэн палэназ ортчись фестивальёсы но вуылӥськом. Кузпалы но бадӟым пимы, Максим, скважина гудон удысын ужало. Соос но ӵем командировкаосы ветло. Соку дорысь ужъёс анаен атай вылын луо. Бадӟым тау юрттэмзылы, - Лена апай но Вася агай сярысь вера кензы Илюза Тимирдиновна.
Василий Камидуллинович но Елена Галяхматовна гумыразы куинь юрт пуктӥллям. Ваньзэ соос асьсэ киосынызы лэсьтӥллям. «Туннэ ми – анай-атай, яратоно песяй-песятай но ӵужай-ӵужатай. Нылпиосынымы тупаса улӥськом. Арлыдо адямиос понна солэсь но бадӟым шуд ӧвӧл, дыр», - шуэ Елена Галяхматовна.
Миляуша БУЛАТОВА.
Калтасы ёрос.
Читайте нас в