Семья пӧлын, эшъёс вӧзын

Трос дыръя, уж пӧлын бергаса, толэзьёслэсь, аръёслэсь ортчемзэс шӧдытэк кылиськод. Берло гинэ мышкад учкыса валаськод: улон сюресын секытэз но, шумпотонэз но трос. Ӟеч калыкен, кужмо семьяен, зэмос эшъёсын ваньзэ чиданы луэ. Соослэн юрттэменызы ик вормон но кузёез доры сюрес шедьтэ. «Мынам Данъян грамотаосы, гадь бордысьтым медальёсы тӥлесьтыд тыршемдэс возьмато», - вераз та нуналъёсы 70 арес тырмон юбилейзэ пусйись Ханиф Баймиев. Со – гурт удыс наукаосъя кандидат, Калыкъёслэн эшъяськон ордензылэн кавалерез, БР-ысь Гурт удысысь сӥё-дано ужась.

Ханиф Муллаевичлэн уж сюресэзлэн бадӟым люкетэз вордскем гуртаз ортчиз. Со 28 ар ӵоже Улысь Балтачысь гурт хозяйствоен – «Социализм» колхозэн но «Рассвет» АО-ен – кивалтӥз. Нош ваньмыз кутскиз Аксёновской сельхозтехникумез йылпумъяса агрономын ужан бордысен. Та нуналъёсы Ханиф Муллаевичлэн вордскем музъемысьтыз культура юртын бадӟым юбилейлы сӥзем ӝыт ортчиз. «Гуртын котькытын Ханиф Муллаевичлэн тыршемез шӧдӥське. Клуб, гаражъёс, школа – ваньмыз со ужан аръёсы ӝутэмын», - вераз гуртозэ ӟечкыласа Улысь Балтач гурт поселенилэн администрациеныз кивалтӥсь Э. Б. Рахимзянов.Эдуард Бурхановичлэсь шуныт кылъёссэ азинтыса выллем, вераськиз Татышлы ёрос Кенешлэн секретарез Р. Г. Рахимов. Зэм, Радик Галимзянович ёрос администрациын ӵошен ужамзы сярысь тросгес вераз. Ханиф Муллаевич 2003-2008-тӥ аръёсы ёрос администрациен кивалтӥсьлэн социальной ужпумъёсъя воштӥсез вал угось. Та нуналэ Х. М. Баймиевлы ёрос Кенешлэсь Данъян грамотазэ сётӥзы.

Юбилейлы сӥзем ӝытын мылкыдзэ усьтытэк ӧз чида Ханиф Муллаевичлэсь ужзэ азинтӥсь А. М. Минлебаев но. «Рассвет» СПК-лэн ужаз али ке но азьвыл кивалтӥсьсылэн кужымез шӧдӥське на. Солэн пытьыез аръёс ӵоже татысь бусыосын, фермаосын, гаражын утиськоз на.

Та нуналэ культура юртэ Ханиф Муллаевичлэн тодмоосыз, ӵыжы-выжыосыз, гуртоосыз, эшъёсыз люкаськизы. Х. М. Баймиевлэн школаын дышетскем аръёсыз сярысь вераз Г. Г. Гарифанов – ӵош дышетскем эшез. Ханиф Муллаевич нырысетӥ тодон-валан басьтэм Улысь Балтачысь сизьым аръем школаын. Сизьым арессэ тырмыса, 1954-тӥ арын, со нокинлы вератэк, нырысетӥ классэ вамыштэм. Ханиф Муллаевичлэн нырысетӥ дышетӥсез Мензада Шайхуллина вылэм. Тямысэтӥ классын со дышетсконзэ Бигиней школаын азинтэм. Котькуд нунал лек сильтӧлэн, куазь зорыку дышетскись гуртаз бертылэм. Ханиф Муллаевичлэн Алексей, Андрей но Александр пиосыз но ӟеч тодон-валан басьтон сярысь сюлмаськизы. Александр туннэ семьяеныз Москваын улэ, со – архитектор. Нош Алексей но Андрей Уфае интыяськизы. Соос кыксы ик биология наукаосъя докторъёс, медициная башкир кун университетысь профессоръёс. Таӵе усто пиосты Ханиф Муллаевич гажано кузпалыныз, БР-ысь сӥё-дано дышетӥсен Ямига Шарифулловнаен будэтӥз.

Ханиф Муллаевич 2008-тӥ арысен пенсиын шутэтске. Но озьы ке но со дораз ужтэк пукыны уг чида. Гуртооссылэн верамзыя, Баймиевъёслэн азбаразы, усто агрономлэсь ужзэ данъяса выллем, котьку пӧртэм емышъёс будо. Со сяна, Ханиф Муллаевич республикаямы ортчись пӧртэм ужрадъёсы пыриське. Со удмуртъёслэн национально-культурной центрзылэн огазеяськонзылэн Кенешезлэн ёзчиез но луэ. «Ханиф Муллаевичез 1996-тӥ арозь уг но тодӥськы вал, - вера НКЦ-ен кивалтӥсьлэн воштӥсез, Янаул городысь Ю. С. Саитов. - Собере ӟеч кусып тупатӥмы. Ханиф Муллаевич огазеяськонэз кылдытонэ бадӟым кужымзэ понӥз, солэсь ужзэ азинтонэ шӧдскымон люкет пыртэ». Та нуналэ Ханиф Муллаевичез ӟечкыланы вуизы на БР-ысь удмуртъёслэн историяя но культурая центренызы кивалтӥсь И. М. Самигулова, Ермекей ёросысь удмурт огазеяськонэн кивалтӥсь А. Н. Вождаева. Со сяна, хозяйствоын ӵошен ужам аръёссэс тодазы вайыса вераськизы Фания Гарифьянова но Галия Шайхуллина.

Та нуналэ Башкортостанысь удмуртъёслэсь дано пизэс ӟечкыласа, пӧртэм гуръёс чузъяськизы. Кузёос сяна, шулдыр кырӟанъёссэс кисьтӥзы Вязовкаысь, Выль Татышлыысь кырӟасьёс но Удмурт Элькунысь Шаркан ёросысь «Тулкым» ансамбль. Ӝытэз «12 пар» кырӟанэн Баймиевъёслэн ансамбльзы йылпумъяз. Кырӟасьёс пӧлын Ханиф Муллаевич но луиз. Со пӧртэм ужъёсты усто бергатэмез сяна, кырӟаны но чебер пӧрмытэ вылэм. Нош семья пӧлын, эшъёс вӧзын куара но котькулэсь жингрес кылӥське, кужым но вормонтэм луэ.

Ольга НИГАМАТУЛЛИНА.