Дас тямыс ар ӵоже – люконтэм эшъёс

«Ошмес» газетэз потыны кутскемез дырысен лыдӟисько ни», - вера Алтау гуртысь Рамзия Тимиряева. Озьы котькуд ар Рамзия апай вордӥськем кылыныз потӥсь газетэн эшъяське. Газет бамъёсысь вань потэм ужъёсты, пе, учкисько. «Одӥгзэ но лыдӟытэк уг кельтӥськы, - шуэ со. – Синъёсы умой уг ке но адӟо, шутэтскыса-шутэтскыса учкисько». Туэ гожтӥськисьёс пӧлын ортчем «Приз каждую неделю» акцие пыриськыса, Рамзия апай кузьым но утӥз.

Рамзия Тимиряева Алтау гуртын ик вордӥськыса будэм. Тямыс классэз быдтыса, фермае скал кыскыны вамыштэм. Татын со 37 ар тыршем. «Одӥг ар но сизьым толэзь лавкаын ужай. Озьы ке но сюлэм берен фермае кыскиз, - вера Рамзия апай. – Школаын дышетскыку кин луод шуыса юамзылы скал кыскись луо шуыса верай вал. Озьы ик луиз». Шутэтскыны потэм бераз но со удысаз кык ар тыршиз на.

Рамзия апай туж мыло-кыдо, кырӟаны-вераны яратӥсь, небыт сюлэмо кышномурт. Со гуртысьтызы «Инвожо» ансамбле пыриське. Ог вить ар ни со учкисьёсты чебер кырӟан-эктонъёсын шумпоттэ. Ансамбльзы ёросазы сяна, республика ужрадъёсы пыриське. «Калык пӧлын ветлыны тунсыко», - вера кышномурт. Рамзия апай киужлы но бадӟым усточи вылэм. Корка ӧсэз усьтэм бере ик, синъёсты диванъёсысь, пуконъёсысь вӧлдонъёс мальдыто. Пӧртэм тусо шортъёслэсь чеберъяса керттэм ужъёс котькинэ бордазы кыско, луоз. «Толалтэ уж сыӵе трос ӧвӧл. Соку керттӥськисько», - вера Рамзия апай. Киужъёсыныз матысьёссэ, ӵыжы-выжыоссэ шумпоттэ.

Рамзия апай али огназ улэ. Юрий кузпалыныз соос вить нылъёссэс будэтӥллям. Жаляса верано, кузпалыз 2008-тӥ арын улонысь кошкем. «Нылъёслэн асьсэ понна семьязы но улонзы. Мынам дас куинь внукъёсы но одӥг правнуке вань ни», - данъяськыса вера со.

Марина НИКОЛАЕВА.

Бурай ёрос.