-16 °С
Лымы
Антитеррор
Вань иворъёс
Общество
28 Куарусён 2017, 14:06

Ужтэк пукыны чидасьтэм песянай

Татышлы ёросысь Майск гуртын улӥсь Марзия Нурисламовалы 77 арес уд но сёты. Песянай котькытчы вутске: юртъер котырез ӝикыт утялтэмын, азбар тыр - курегъёсыз, ӟазегъёсыз, ыж но со вордэ на. Пудо возьман черод вуэ ке, ачиз, пе, кыре потэ. Дорысьтыз ужъёссэ быдэсъяса, Марзия апай бускельёсызлы, матысьёсызлы но юрттӥське. Кылсярысь, дорысьтыз картофказэ октыса быдтэм но, та бадӟым но секыт ужез быдэстыны кӧня ке арлыдо гуртоосыз доры но вуылэм. «Кӧрышъёсын, гуртоосын тупаса улӥськом», - вера со.

Татышлы ёросысь Майск гуртын улӥсь Марзия Нурисламовалы 77 арес уд но сёты. Песянай котькытчы вутске: юртъер котырез ӝикыт утялтэмын, азбар тыр - курегъёсыз, ӟазегъёсыз, ыж но со вордэ на. Пудо возьман черод вуэ ке, ачиз, пе, кыре потэ. Дорысьтыз ужъёссэ быдэсъяса, Марзия апай бускельёсызлы, матысьёсызлы но юрттӥське. Кылсярысь, дорысьтыз картофказэ октыса быдтэм но, та бадӟым но секыт ужез быдэстыны кӧня ке арлыдо гуртоосыз доры но вуылэм. «Кӧрышъёсын, гуртоосын тупаса улӥськом», - вера со.
Марзия Хазимардановналы одӥг арес гинэ вылэм, Быдӟым Атыкай ож кутскем. Сое со уг ке но тоды, ож бере секытлыкъёсты трос адӟем. Сютэмлыклэсь, кутэн, куэм дӥськутэн ветлонлэсь марзэ со ӟеч тодэ. Марзия апай 4-тӥ классозь гуртазы дышетскем, 5-7-тӥ классъёсы со Выль Татышлые ветлыса тодон-валан басьтэм. «Дышетскыны мылкыды вань вал, но ӧз пӧрмы. Сизьыметӥ классэз быдтэм бере, атай шуиз: гурт калыклэсь, пе, пудооссэ возьмась ӧвӧл. Оло, тон потод-а шуыса юаз. Мон соглаш луи, быдэс гужемез кырын пудо возьмаса ортчытӥ. Али сизьымез быдтэм пиналэз пудо возьманы лэзёд шат? Со арын ик сӥзьыл парсь утьыны пыри. Парсьёсты люктаны ву карнанэн нуллӥськом вал, пыдын – кут. Пӧсьвуаськем дыры но луиз ини. Василя эшеным лымы усем бере парсьёсты кыре поттыса но нуллӥськом вал. Озьы тӥни дышетскон сярысь малпанэз уж воштӥз», - вера Марзия апай.
Песянайлэн уж сюресэз солэсь но вазьгес кутскем, шуыны луоз. Витетӥ классэ йылпумъям бераз, со бусыын уриськем. «Гужем нуналъёс колхоз бусыосын ортчылӥзы шуи ке но, янгыш уз луы, дыр. 20-25 кузя люкаськыса ю бусыосты уриськом вал. Со ужам дыръёсы кытын меда? Пинал дыръя ужамез вераны ке кутскид, быдэс нуналэд но уз тырмы», - шуэ песянай.
Дас ньыль аресаз Марзия Хазимардановна атайзэ ыштэм. Воргоронэз войналэн яраосыз куасалтӥллям. Куать нылпи анаенызы гинэ кылиллям.
Нунал бӧрсьы нунал – ортчылӥллям аръёс. Туннэ нуналэ Марзия апай – шудо анай, песяй но ӵужай. Миллиаскар кузпалыныз соос куинь пи но одӥг ныл будэтӥллям. «Миллиаскарелэн кулэмезлы кык ар ини. Со дырысен мон огнам улӥсько. Шумпотоно, нылпиос асьсэ семьяосынызы уло, ужало», - вера анаймурт. Миллиаскар Нурисламович дышетӥсь вылэм, черчение, труд, суредаськонъя но немец кылъя урокъёсты нуэм. Картэзлэн уж сюресэныз тодматыса М. Нурисламова вера: «Со Янаул ёросысь Ямады школаын но ужаз. Арнялы быдэ отысь пыдын, толалтэ - куасэн бертэ вал. Вязовкаысь, Бигинейысь школаосын но нылпиослы тодон-валан сётӥз. Берло Выль Татышлы школаын дышетӥз».
Кытын гинэ Марзия апай мед ужалоз – нюлэскын силё ӝуатэм-а, пудоосты сюдыны пигесозяз лымые выйыса кыз вайёсты корам-а, ю тысь октон вакытэ комбайнысь куро куяса ветлэм-а, фермаын пудо вордӥсьёслы юрттӥськем-а – ужзэ со котьку тыршыса, сюлэмзэ поныса быдэсъям. Али но со ужтэк пукыны уг чида. «Нуналлы быдэ сямен возьёсты, бусыосты котыръяса бертӥсько. Дорын пукыны сюлмы уг чида. Инкуазь мыным кужым сётэ. Макем шулдыр угось Майск котырысь нюлэсъёс», - вера песянай.
Миляуша БУЛАТОВА.
Татышлы ёрос.