«Гужем каникулъёс вунонтэм луизы»

Гужем ортчиз. Нылпиос нош ик партаос сьӧры пуксизы. Малпанъёсынызы соос ӵем каникулъёсазы берытско, пайдаё но тунсыко ортчытэм шутэтскон нуналъёссэс тодазы ваё. Янаул ёросысь Вуж Варяш школаын укмысэтӥ классын дышетскись усточи нылаш Алина Набиуллина туэ гужем «Усточикар» лагерьын но шутэтскем, каникулъёсызлэсь берпуметӥ нуналъёссэ со «Шундыкарын» ортчытэм. Тунсыко гужем нуналъёссэ нылаш шуныт тодэ ваёнъёсаз возе.

- «Усточикар» – мыным тодмо, сюлэмелы матын луись лагерь. Мон отчы туэ куинетӥ ползэ вуылӥ. Отын трос эшъёс шедьтӥ, пӧртэм ӧнеръёсъя тодон-валанме узырмытӥ: кык ар фольклоръя мастерское ветлӥ, туэ «Дӥськут-дизайн» ӧре пыриськи. «Усточикаре» мон шумпотыса мынӥсько, малы ке шуоно тодӥсько - отын котькуд нунал тунсыко ортче, пӧртэм ужрадъёс радъясько. Нош «Шундыкарез» мон шудыё дуннеен ӵошатысал. Отчы мон нырысьсэ вуылӥ ке но, мыным отын ваньмыз туж кельшиз. Малпасько вал, мӧзмо шуыса. Ӧй, чик бертэме ӧз поты. Нуналъёс тырмытэкгес но кылизы. Отрядамы ми одӥг семьяын кадь улӥм, ваньмы эшъяським, ӵошен кырӟанъёс но малпаллямы. Собере гитараен кырӟаськом вал. «Шундыкарын» мон суредаськонъя мастерское ветлӥ. Занятиос туж аспӧртэмесь вал, трос выльзэ мон тодӥ. Ӧнерчимы Чудья Жени «Тужгес устоез ӧнерчи» нимлы кузё луиз, - маде Алина.

- Нош кык лагерьёсты ӵошатоно ке? – юасько Алиналэсь.

- «Шундыкаре» шедён понна, аслэсьтыд усто быгатонлыкъёстэ, творческой адями луэмдэ возьматоно. Отчы огшоры гинэ уз басьтэ. «Усточикарын» мастерскойёс ӧжытгес. «Шундыкарын» тросгес ужрадъёс ортчыло, отын ваньмон дыред ик уз луы, - вера Алина. – «Шундыкаре» мон эшшо мынысал, туж но туж со мыным кельшиз! Таиз гужем каникулъёс вунонтэм луизы.

Миляуша БУЛАТОВА.

Янаул ёрос.