-17 °С
Салкым
Антитеррор
Вань иворъёс
Общество
21 Куарусён 2017, 13:27

Сюлэм шунытсэ трос нылпиослы огвыллем люке

Нина Гайниярова дышемын ни сюлэм шунытсэ трос нылпиослы люкыны. «1989-тӥ арын нырысетӥоссэ пиналъёсты школае келяй», - ортчем аръёсаз берытскыса вера со. Нина Галихановна 28 ар ӵоже ни Выль Татышлыысь нылпи садын воспитатель луыса ужа. Зэм, школазэ йылпумъямез бере со ассэ эмчиын адӟе вылэм – медучилищеын тодон-валан басьтэм. Нош собере егит нылэз улон мукет ӧре кыскем. Озьы Нина Галихановналы нылпиосын ужан понна, выль удыслы дышетсконо луэм. Табере со нылпиослэсь тазалыксэс гинэ ӧвӧл, мылкыдзэс но ӟеч вала.

Нина Галихановна котькуд визьнодам пиналзэ шумпотыса тодаз вае, солэн улонын, школаын басьтэм вормонъёсызлы шумпотэ. «Азьвыл аръёсын ӵошатыса, туала нылпиос мукетэсьгес. Соос сокем возьдаськисесь но ӧвӧл ни, ӟуч кыллы но пичиысен дышыса будо. Куддыръя мон пиналъёс шоры учкыса, соосты анай-атаенызы ӵошатӥсько. Соос но тросэз мон пыр потэмын», - вера воспитатель.
Туннэ Выль Татышлыысь бадӟым, чебер нылпи садэ 43 пинал ветлэ. Нош кылем арын татын 54 нылпиен ужаллям. «Дас куать пиналэз школае келямы, - шуэ нылпи садэн кивалтӥсь Ольга Ивановна Константинова. – Соосты сизьым пичиос воштӥзы». Нылпиосты кык группаослы люкыса ужало. Соосты визьнодан бордын куинь воспитательёс тыршо. Нылпиос трос дыръя соосты анайзы интыын шӧдо. «Котькудӥз пинал ас понназ мусо. Тани таизлэн ныллэн нуназе кӧлэмез уг поты. Со басьтыны лыктэмзэс вите», - палэнынгес шудӥсь ныл шоры учкыса вера Нина Галихановна. Солэн пичиез Аделина нылыз но али гинэ нылпи садэ ветлӥз вал кадь. Анаез аръёслэсь ортчемзэс шӧдытэк но кылиз. Аделиназэ со школае келяз. Табере нылпи садэ ветлэ бадӟымезлэн Ангелина нылызлэн пиез.
«Нина Галихановна аслэсьтыз улонзэ нылпиостэк уг ни адӟы, дыр, - вера нылпи садэн кивалтӥсь. – Со котькуд нунал татчы, дораз сямен, шумпотыса лыктэ». Соин пиналъёсыз но солэсь мылкыдзэ люко, нылпи садэ пальпотыса вуо.
Ольга НИГАМАТУЛЛИНА.
Татышлы ёрос.
Читайте нас в