-15 °С
Лымы
Антитеррор
Вань иворъёс
Общество
13 Куарусён 2017, 02:00

Ӵошен кышкыт ӧвӧл сильтӧл

Екатеринбургын ортчем «День народов Среднего Урала» праздник дас вить сюрслэсь трос адямиосты огазеяз.

Празднике вуэмъёс куамынлэсь трос «коркаосы» пыраса, калыкъёслэн культураенызы, сям-йылолъёсынызы тодматскыны быгатӥзы. Татын ик пӧртэм ӧръёсъя мастер-классъёс ужазы. Ужрадэ Свердловск улосвылысь удмуртъёслэн «Эгес» огазеяськонзы но азинлыко пыриськиз. Екатеринбургысь, Дегтярскысь, Режысь, Нижнесергинск ёросысь Первомайск посёлокысь, Ирбит муниципал огазеяськонысь Стриганское селоысь но Сысерть городысь творческой коллективъёсын дасям удмурт коркан, кылсярысь, куноосты перепечъёсын, шулдыресь удмурт кырӟанъёсын пумитазы, пельнянен куноязы. Мылкыд карисьёсты Сысертьысь Мария Даутова черсыны дышетӥз, нош Диана Галихановаен Екатерина Ягуткина куролэсь но басма кесэгъёслэсь мунё тупатон амалъёсын тодматӥзы.
Дас витетӥ ползэ ортчем праздник котькинлэн тодаз кыльымон луиз. Татын «Эшъяськон писпу» но ӝужаз. Солэн вайёсаз калыкъёс асьсэлэсь культуразэс возьматӥсь тодметпусъёссэс интыязы. «Эгес» огазеяськон кык тӧдьы юсьёсты дасям: Адями-юсь Удмурт Республикалэн гербаз но возьматэмын угось.
Миляуша НИГАМАТУЛЛИНА.