-18 °С
Салкым
Антитеррор
Вань иворъёс
Общество
13 Куарусён 2017, 14:18

Будья варяшъёс ӵошкыт ульчаостӥ ветло

Гуртын улӥсьёсты тужгес сюлмаськытӥсь ужпум – со сюресъёс, зоро дыръя пырыны-потыны луонтэм урамъёс. Янаул ёросысь Будья Варяш но куке но таӵе югдурын вал. Нош туннэ будьяос ӵошкыт ульчаостӥ ветло ни, соослы нокыӵе зоро-кото нуналъёс табере кышкыт ӧвӧл.

Кылем арын гурт калык «Программа поддержки местных инициатив» проектэн (ППМИ) пайдаяськыса, урамъёссэс тупатыны кенешиз. Туэ со уж йылаз-пумаз вуттэмын. «Будья Варяшын вань ульчаос - кык иськем но ньыль сю метръем сюрес – лэсьтэмын. Тендеръя 1 млн 280 сюрс коньдон висъяськиз, «Колхоз Восток» СПК спонсор юрттэт возьматӥз - 200 сюрс манет сётӥз, 160 сюрс манет калыклэсь люкамын вал, 160 сюрс интыысь бюджетлэн коньдонэз уже кутэмын. Вераны кулэ, Будья Варяшлэн урамъёсыз али чылкак воштӥськемын. Уд но малпа, азьло отчы пырыны уг луы вал шуыса», - вера Вуж Варяш гурт поселенилэн администрациеныз кивалтӥсь Миншакир Шаритдинов.
Туэ ППМИ-ен Вуж Варяш гурт поселение пырись Наняды гуртын улӥсьёс но пайдаяськоно кариськизы. Гуртын шутэтскон инты кылдытон сярысь проект конкурс пыр ортчемын. Аукцион но луэм. Кематэк Нанядыын бадӟым уж кутскоз. Та пумысен Миншакир Шайсламович вера: «Наняды гурт вӧзысь ошмесэз паськытатомы, пруд тупатомы. Отын пыласькыны но луоз. Шутэтскисьёс «губиос» улэ интыяськем скамейкаосын пукыны быгатозы. Со сяна, волейболэн шудыны площадка тупатомы. Нош толалтэ прудысь йӧ вылын хоккеен шудыны луоз. Прудлэн мукет яр дураз – шутэтскон зоналэсь палэнынгес - пирс тупатэмын луоз. Тылпу кысон машинаослы ву басьтыны шуг-секытъёс уз кылдэ. Та ужъёсты быдэстонлы республика бюджетысь 600 сюрс коньдон висъямын, 90 сюрс – калыклэн коньдонэз, 50 сюрс манет тыр «Колхоз Восток» спонсор юрттэт возьматӥз, 100 сюрс манет - интыысь бюджетлэн коньдонэз».
«Бадӟым но пичи городъёсын, озьы ик гуртын улӥсьёс понна ӟеч луонлыкъёс кылдытоно» - таӵе ужпум пуктэ Россилэн Президентэз Владимир Путин. Шаерамы ужась программаосын пайдаяськыса, калык юрттэт возьматэмен, гуртын улон умой пала шӧдскымон воштӥське.
Миляуша БУЛАТОВА.
Янаул ёрос.