Буре ваиськом, тодын возиськом!

Нуналысь нуналэ кыдёке кылё кышкытэсь Быдӟым Атыкай ож аръёс. Мертантэм дун тыриллям асьмелэн песятай-ӵужатайёсмы вормон понна. Кӧня солдатъёс кылемын ож луд вылэ. Со лудъёслэн «яраоссы» кемалась ке но бурмизы ни, Быдӟым Атыкай ож уг вуны, со сюлэмъёсамы улэ. Ноку ум вунэтэ ми шаерез тушмонъёслэсь утён понна нюръяськемъёслэсь нимъёссэс, подвигъёссэс. Котькуд семья кышкыт аръёсты ас вылаз шӧдӥз, тушмонэз вормон сярысь сюлмаськизы ож мышкын тыршемъёс но. Ож бере шаерамы, кулэм солдатъёсты буре ваён вылысь, памятникъёс, монументъёс, обелискъёс «ӝужазы».

Татышлы ёросысь Улысь Балтач гуртын но оже бырем гуртоослы памятник вань. Со 1987-тӥ арын усьтэмын вылэм. Гурт поселенилэн администрациеныз кивалтӥсьлэн Эдуард Рахимзяновлэн сюлмаськемезъя, гуртысь памятникез выльдыны чакламын вал. Кивалтӥсьлэн малпанэзлы дурбасьтӥсьёс трос луизы. Юрттэт возьматыны мылкыд карисьёс понна нимысьтыз счёт усьтэмын вал. Отчы котькин коньдон выжтыны быгатӥз.

Бадӟым ужез быдэстон борды басьтӥськиз Бигиней гуртысь Арсен Аскаров. Спонсор юттэт возьматӥзы Рудик Гарифьянов, Григорий Шайхиев, Клариса но Виктор Самойловъёс, Владимир Шайхуллин, Евгений Минияхметов, Эдуард Рахимзянов, Гарифулла Гарифанов, Салават Шайхуллин, Александр Ахмадуллин, Георгий Зидымаков, Казёк Шайдуллин (туннэ нуналэ со пӧламы ӧвӧл ни) но мукетъёс.

Дас куатетӥ толсуре Улысь Балтачын выльдэм памятникез усьтонлы сӥзем ужрад ортчиз. Отчы пыриськизы ёрос администрациен кивалтӥсьлэн воштӥсез Ралиф Рахимов, ёросысь военной комиссар Ансар Арсланов, ёросысь ветеранъёслэн кенешенызы кивалтӥсь Анас Магзумов, Россиысь ДОСААФ-лэн интыысь ёзэтэныз кивалтӥсь Марс Самигулов но мукетъёс. Марс Сабирьянович Эдуард Рахимзяновез, пиналъёс но егитъёс пӧлын патриотической воспитаниез азинтонэ трос кужымзэ понэмез понна, тау карон гожтэтэн пусйиз. Эдуард Бурханович люкаськем калыклы вазиськыса шуиз:

- Калык коньдонэн юрттэмен но «Реальные дела» программа азинлыко ужамен, Быдӟым Атыкай оже пыриськемъёслы сӥзем памятникез выльдыны быгатӥм. Таӵе бадӟым ужез оген быдэстыны уг луы, соин ик ваньзылы, кин кужымзэ понӥз та уже, бадӟым тау кылъёсме верасько. Быдэстэм ӟеч ужъёсты асьтэлы ӟечен ик мед берытскозы.

Зэм, из адямилэсь кема улэ. Но котьмае вунонтэм каре адями, солэн ужез, подвигъёсыз. Аръёс ортчыса но, гуртысь памятник вӧзы вуттӥсь сюрес уз ышы, отчы ялан вуылозы Вормон Нуналэз ваем геройёслэн нылпиоссы, внукъёссы, внукъёссылэн внукъёссы. Ортчемез уг вуны, Быдӟым Атыкай ожысь ветеранъёслэн нимъёссы уз ышы.