Удмурт огазеяськонлэн пытьыостӥз

1996-ТӤ арын Башкортостанын выль огазеяськон кылдӥз – удмуртъёслэн национально-культурной центрзы. Соин кивалтонэз ас вылаз басьтӥз Ренат Биктимирович Галямшин. Со дырысен центр пӧртэм ёросъёсысь удмуртъёсты огазеяз, ог-огенызы тодматӥз. Берло огазеяськонлэн котькуд ёросын ёзэтъёсыз кылдӥзы. Со пӧлысь тужгес бадӟымез Янаул ёросын луэ.

Вераны кулэ, татысь удмурт огазеяськон 1991-тӥ арысен ужа. Озьыен, туэ солы кылдэмез дырысен 25 ар тырмиз. Соин интыысь огазеяськонэн кивалтӥсь Юрис Саитов ёросысьтызы бадӟым удмурт гуртъёсын та лыдпуслы сӥзем ужрадъёс ортчытыны малпаз. Нырысетӥез пумиськон Вуж Варяшын радъяськиз.

Кызь вить ар ӵоже варяшъёс национально-культурной центрлэн кичӧлтэмезъя радъяськись пӧртэм ужрадъёсты пумитазы. Кылсярысь, татын «Чеберина» конкурс, нылпи творчествоя фестиваль, пиналъёслэн гужем олимпи шудонъёссы но мукет со выллем ужрадъёс ортчизы. Юрис Саитовичлэн верамезъя, соос пӧлысь котькудаз дасяськыкузы гурт хозяйстволэн, гурт поселенилэн администрациезлэн, культура юртлэн, школалэн ӵошен ужамзы шӧдӥське. Ужрадъёсты чебер-кырӟан эктонъёсын, пӧртэм фольклор композициосын узырмытэ «Югдон» калык ансамбль. Та нуналэ Ю. С. Саитов ансамбле ветлӥсьёсты но удмурт огазеяськонлэн ужаз пыриськисьёсты Данъян грамотаосын пусйиз.

Собере кыл сётӥськиз БР-ысь удмуртъёслэн НКЦ-енызы кивалтӥсьлы Салимьян Гарифуллинлы. Со бадӟым ужез вырӟытэмез понна Ренат Биктимирович Галямшинлы тау кариз. Нош собере вӧсьёсты улӟытон, «Ошмес» газетлэн удмурт калыклэн улоназ кулэлыкез сярысь мадиз. Салимьян Гарифуллинович вераськонзэ йылпумъяса, Янаул ёросысь удмурт огазеяськонэн кивалтӥсез вань удмуртъёслэн «Удмурт Кенеш» огазеяськонзылэн Тау каронэныз данъяз. Со сяна, С. Г. Гарифуллин Вуж Варяш гурт поселенилэн администрациеныз кивалтӥсез М. Ш. Шаритдиновез, «Колхоз Восток» СПК-ен кивалтӥсез В. К. Камиуллинэз, Вуж Варяш школалэсь директорзэ В. Г. Асатовез, культура юртэн кивалтӥсез Р. М. Нигиевез но фольклоръя ӧнерчиез Э. Г. Шараеваез НКЦ-лэн данъян грамотаосыныз пусйиз.

Пумиськон бадӟым концертэн йылпумъяськиз. Учкисьёсты Вуж Варяшысь «Югдон» ансамбль но мукет кырӟась-эктӥсьёс сяна, Татышлы ёросысь Кызыл-Ярысь «Марӟан» но Улысь Балтачысь «Ӧрӟи» ансамбльёс, Вязовкаысь Фирая Туктамышева шулдыртӥзы.