Улыны кужым сёто нылпиосыз

Бускельёсынымы туж тупаса улӥськом: ӵош ужаськом, шулдыръяськиськом, киужен выриськом, ог-огмы доры мунчое но потаськом. Туннэ гожтэме потэ соос пӧлысь одӥгез сярысь. Кунгож сьӧрысь но Удмуртиысь эшъёсы куное вуо ке, соин данъяськыса «та мынам бигер ӵужкенаке» шуыса тодматӥсько. Солэн анаез но атаез – зэмос бигеръёс, нош ачиз удмурт луэмын ни. Паймемысь уг дугдӥськы, макем ӟеч тодэ Дифина Закиевна Арманшина удмурт кылэз, соин валче удмурт сям-нергеосмес но. Сое удмурт сямен улыны, йылолъёсты утьыны, удмурт пӧр-пӧзьтӥськонъёсты дасяны дышетӥз соин ӵош 92 аресозяз улэм картэзлэн анаез Минзи.

Алигес 60 арессэ пусъем кышномуртлэн улон сюресэз кутске Татышлы ёросысь Арибаш гуртын. Ӝог ортче шаян пичи дырыз, школае вамыштэм бере вакыт эшшо но чалякгес, бызись ву кадь гылӟе. Кияз аттестатэн Дифина кема малпаськыса уг улы, кооперативной училищее документъёссэ сётэ. Нылашез вуз карон уж пичиысен ик бордаз кыскиз, анаез но гуртысьтызы магазинын ужа вал уго. Дышетсконзэ йылпумъяса, нырысь анаез бордын ужа, собере Уразгильды гуртэ выже. 1970-тӥ аръёслэн шораз гуртъёсын одӥг райпо магазин гинэ ужа вал, соин отчы пырасьёс ӧз бырылэ. Егит нылэз кышнояськыны вуэм пиос но синйылто: кин ке, магазинэ пырыса, вузкарись шоры дол-дол учкыса ужамзэ эскерыса сылэ, куд-огез вазьыны но дӥсьтэ, куинетӥез ӝыт келяса но вуттэ. Тужгес дӥсьтӥсезлы, Раис нимо пилы, вузкарись сюлэмзэ кузьма. Егитъёс вань ӝытъёссэс ӵошен ортчытъяло, азьланьын ӵош улонзы сярысь малпасько. Витьымтэ шорысь Раисэз армие басьто. Уфаысь призывной пунктын воинской часте лэземзэс возьмаса жадем вуоно солдат дораз берытскыны малпа, Дифинаез уз возьма, бызёз шуыса кышка. Бертыса соку ик удмурт сямъя вылькенак пыртэ, со бӧрсьы гинэ выльысь армие кошке. Озьы Арибаш гуртысь бигер ныллэн улонэз пыраклы Уразгильдыен но удмурт пияшен герӟаське.

Огзы бӧрсьы огзы вордӥсько яратонзылэн емышъёсыз –Людвиг, Алик, Лилия нылпиоссы. «Али гинэ вал кадь пичи дырзы. Аслам анайёсы доры мынӥськом ке, нылпиосы соку ик «ойдо бертом, алама верасько таос» шуо вал, бигер кылэз уг валало бере. Али ачим песянай но ӵужанай луыса гинэ валасько, кыӵе возьмало вал, дыр, ӵужанайзы но ӵужатайзы асьсэлэсь внукъёссэс», - вера ӵужкенак.

Сандык кадь юрт, нылпиос, уж – ваньмыз адӟем карымон. Шӧдтэк шорысь Раисэзлэн улонэз, шудтэм учыре сюрыса, чигиське. Соин валче чигиське Дифина но. Солы соку 45 арес сяна ӧй вал на. Кӧня ке дыр ортчыса, анаймурт нылпи кайгу адӟоно луэ на: шоретӥ пиез, Алик, мотоциклэн пазьгиське. Кышномурт понна улонлэн чеберез но дунлыкез ыше. «Трос янгышъёс лэсьтӥ таӵе адӟон пыр потэм бере. Улон таин бырымтэ, нылпиосы кин доры анай карыса бертозы шуыса малпан гинэ кельтӥз на монэ дуно адямиосы сьӧры кошконлэсь», - кайгуэныз люкиське бускеле.

Туннэ нуналэ Дифина Закиевна нылпиосыныз, нылпиосыз понна улэ. Со – шудо «песяйка». Тазьы нимало сое Чернушка городын улӥсь бадӟым пиезлэн Максим но Кирилл пиосыз, соосын ӵош озьы ик шуизы Вылысь Татышлыысь нылызлэн Настя но Даша нылъёсыз.

Кыӵе кырӟанъёс кельшогес меда Дифина ӵужкенакелы, удмурт яке бигер? Таӵе юанлы со дась вылэм. «Туала удмурт эстрада кельше, - вера ӵужкенак. - Яратоно удмурт кырӟасеным – Николай Анисимовен – шуд усиз туэ гужем фотое но пуксьыны. Нош бигер кырӟанъёс лулпушме бугырто. Соосты огнам дыръя кылзӥсько, бӧрдӥсько».