"Мон - удмурт, удмурт гуртын будэмын"

Берло валай, та бадӟым уж мон понна гинэ кышкыт  вылымтэ шуыса. Респондентъёс – юаськоно адямиос – пӧлысь но куд-огез лыдъян-чотанлэсь кышкаса улӥллям. Та вакытэ пӧечи лыдъясь-чотасьёс но «куное» вуылыны быгато угось. Одӥгез песяй, зэмзэ ик, мынэсьтым ӧжытак кышкатскиз. «Азямы - зэмос лыдъясь-чотась. Солэн нимысьтыз жилеткаез, шарфез, сумкаез, планшетэз вань», - валэктыны тыршиз солы вӧзаз пукись кузпалыз. Песянайлэн мылкыдыз ӝутскиз, монэн сюлмысь вераськыны кутскиз.

Одӥг нунал куспын лыдъясь-чотасьлы трос юртъёсы пырано, пӧртэм калыкен пумиськоно луэ. Арлыдо кузпалъёс доры пыри. Кузё кышномурт гур котыраз берга – нянь пыже. «Нылпиосы жингыртӥзы, дорамы, пе, вуыломы. Соосты ческыт нянен кунояло», - шумпотыса вера песяй. Нылкышнолэн кылъёсаз нылпиоссэ юн яратэмез, соосты чидатэк витемез шӧдӥське. «Кыӵе умой,нылпиос анай-атайёссы доры ӵемысь ке вуыло», - малпай мон соку. Нош юртысь потыку, капка азе машина дугдӥз. Выль тодмоосылэн нылпиоссы анай-атайзы доры бертӥзы.

Нимысьтыз вераме потэ дышетӥсьёс сярысь, малы ке шуоно мыным соосын трос пол пумиськоно луиз. Соос лыдъян-чотанлы бадӟым саклык висъяло. Тросэз дышетӥсьёс стационарной участокъёсы вуылӥллям ни. Динара Марданова, кылсярысь, Вылысь Татышлыысь нырысетӥ номеро школаын ужа. Монэ со шумпотыса дораз пумитаз. Дышетӥсен лыдъян-чотанлэн юанъёсыз пумысен сюлмысь вераським. «Мон - удмурт, удмурт гуртын  будэмын», - данъяськыса вераз со.

Вераме потэ одӥгез тунсыко учыр сярысь. Тодмоосы доры йыгаськисько.

- Ӟечбуресь! - ӧсэз усьтэмез бере вазисько Надим агайлы.

- Тӥ мынэсьтым нимме  но тодӥськоды? - паймыса юаз со.

- Кузпалдылэсь но тодӥсько, - серем пыр вазисько солы.

Надим агай - милям одӥгез ӵыжы-выжымы. Ымнырмы маскаен шобыртэмын бере, тодмо адямиос но тодмотэмлы пӧрмо ни.

Арлыдоосын ӵошатоно ке, егитъёслэн лыдъян-чотан пумысен малпанъёссы чылкак пӧртэмесь. «Малы кулэ лыдъян-чотан?» - паймыса сямен юало соос. «Калыкез лыдъян-чотан шаермылэн историяз бадӟым инты басьтэ, - валэктыны тыршисько соослы. - Со пӧртэм социальной но экономической программаос кылдытыны юрттоз. Кылсярысь, анаймурт капитал программа 2002-тӥ арын ортчем лыдъян-чотанлэн лыдпусъёсыз вылэ пыкъяськыса дасямын». Озьыен, черодысь лыдъян-чотан бере но та выллем программаос трос луозы на. Соин дорады лыдъясь-чотась йыгаськиз ке, та бадӟым ужрадлэсь палэнэ эн кыле.