Тазалыкез дыраз эскерон кышкыт висёнъёслэсь утёз

Калтасыысь эмъюртэ сое «Модернизация, оснащение  дооснащение первичного звена здравоохранения» кун программая басьтӥзы. Вераны кулэ, кылем арын та программа улсын эмъюртын туала куронъёслы тупась флюорографической аппарат ужаны кутскиз.

- Эмъюртамы маммограф ӧй вал на. Нылкышноос тазалыксэс эскерон понна палэнэ ветлоно луизы. Табере соослы трослы каньылгес луоз, коньдонзэс но шӧдскымон шыръялозы, - вера Калтасы ёрос эмъюртысь валтӥсь эмчилэсь ужзэ быдэсъясь Ильшат Фаткуллин.

Ильшат Ильдаровичлэн верамезъя, выль маммограф кышкыт пыктосъёсты дыраз шараяны юрттэ. Жаляса верано, Калтасы ёросысь нылкышноос пӧлын но «рак груди» висёнэн курадӟисьёс вань. 2020-тӥ арын, кылсярысь, ньыль адямилы таӵе кышкыт диагноз пуктӥзы, 2021-тӥ арын – тямысэзлы, туэ – кыкезлы. Озьы ке но вунэтоно ӧвӧл, туала вакытэ дыраз шараям висёнэз вормыны быгато.

Калтасы ёросын выль маммографен ужалозы рентген-лаборантъёс Светлана Гарипова но Андрей Семёнов. Андрей Михайлович татын 24 ар ӵоже тырше ни. «Выль маммограф нылкышноослэсь тазалыксэс ӟечгес эскерыны юрттоз», - вера со. Жаляса верано, туннэ Калтасы ёросысь эмъюртын рентгенологзы ӧвӧл. Но, валтӥсь эмчилэн кылъёсызъя, матысь дыре татын эмчизы луоз. Нош али соослэн та ласянь Нефтекамскысь эмъюртэн ӟеч кусып тупатэмын. 

Андрей Михайлович калыклэсь тазалыксэ утён удысэ Бирскысь эмчиосты дасянъя училищеез йылпумъямез бере вуиз. Бадӟым Туганеевоысь егит ӧнерчи уж сюрессэ Кучаш гуртын фельдшер луыса кутскиз. Бӧрысь сое ёрос эмъюртэ ӝог эмъюрттэт возьматонэ ужаны кутӥзы, берло отын ин граждан обороная фелдьшерын тыршиз.

- Трос ар ӵоже одӥг интыын ужаса, мукетаз потэм ик уг поты, - вера Андрей Михайлович. - Облучение тырмыт басьтӥське ке но, со чик уг кышкаты.

Фото: Калтасинская заря