Инкуазь сярысь сюлмаськыса

Витетӥ инвожоысен Россиын «Всероссийская премия борцов с мусором» акция ортчиз. Отчы шаермылэн 58 регионъёсысьтыз 400-лэсь ятыр адями пыриськиз. Пӧлазы луизы куд-ог регионъёсын кивалтӥсьёс, артистъёс, депутатъёс, кун службаын ужасьёс.

Алигес акцилы йылпумъянъёс лэсьтӥзы. Котыр улосэз жуг-жаглэсь мозмытон ужрадэ пыриськемъёс пӧлысь тросэз – Башкортостанын, Пермь шаерын но Санкт-Петербургын улӥсьёс. Соос котьку жаг бичан сярысь сюлмаськиллям:уждуразы мыныкузы, отысь бертыкузы, магазинэ потыкузы, паркын шутэтскыкузы но мукет. 25 нунал куспын огъя 370 сюрс литр жуг-жаг бичаллям. Дюртюлиысь Айгуль Муллагалиева, кылсярысь, «Герой раздельного труда» номинациын вормисе потӥз.

Та выллем акциос жуг-жаген нюръяськонын, инкуазь ваньбурез утёнын бадӟым юрттэт луо. Соос «Экология» нацпроект улсын радъясько.

Фото: Алексей Самирзянов.