Нылпи куара улонэз шулдыртэ

Башкортостанын куартолэзе но инвожо толэзе тросгес нылпиос вордскизы. Кык толэзь куспын, кылем арысь та дырен ӵошатоно ке, республикамы 88 пинналлы узыргес луиз.

«Та лыдпус сокем бадӟым ӧвӧл ке но, таӵе лыдпусъёсын асьмеос 2015-тӥ арысен нырысьсэ пумиськиськом. Та ласянь азьланяз но азьпала вамыштыны тыршоно. Со понна республикаямы бадӟым ужъёс нуисько: егит семьяослы юрттэт возьматӥське, пиналъёсты нылпи садъёсы но школаосы интыосын тырмытӥськом, дышетскон юртъёс, эмъюртъёс ӝутӥськом. Асьмелэн валтӥсь ужпуммы – таза но визьмо нылпиосты будэтон. Экономикаын секыт югдур ке но кылдӥз, коньдонмес нылпиос бордын ум шыръялэ», - вотэс бамаз гожтэ Башкортостан Республикалэн Тӧроез Радий Хабиров.

- Башкортостанын нылпиослэн лыдзылэсь кулэсмонзэ дугдытыны быгатӥмы, - БР-ысь Правительствоын ортчем кенешонын ивортӥз семьяя, ужъя но калыкез улонын утёнъя министр Ленара Иванова.

2020-тӥ арын Башкортостанын 40 сюрслы матэ нылпиос вордӥськозы шуыса малпало. Республикаысь юстицияя кун комитетлэн лыдпусъёсызъя, нырысетӥ паларын 20278 пинал вордӥськемын. Та лыдпус кылем арысь паларлэсь 613 пиналлы ӧжытгес.

- Берло вакытэ семьяосын куинетӥ нылпиос тросгес вордскыны кутскизы. Туэ ньыль толэзь куспын, кылем арысь толшор-оштолэзен ӵошатоно ке, куинетӥ нылпиос кык процентлы тросгес луизы. Семьяосын ньылетӥ пиналъёслэн но лыдзы йылӥз.

- Нылпиослэсь лыдзэс будэтон понна лэсьтӥськись ужрадъёслэн емышсы шӧдскымон, - вера Ленара Иванова.- Озьыен, инфраструктураез выльдон, калыкез тазалыко улонэн эшъяськытон но мукет та выллем ужъёсты быдэстон бордын юнме ум тыршиське.

Башкортостанын, шаерысьтымы мукет регионъёсын сямен ик, нылпиослэсь лыдзэс будэтонэн герӟаськем ужрадъёс Россилэн Президентэзлэн Владимир Путинлэн куронэзъя кылдытэм «Демография» национальной проектъя быдэстӥсько.

Туспуктэмез Наталия Романовалэн.