Ожгарчиез но куасчиез ум вунэтэ

Сергей Вениаминовичез буре ваён митинг кылем арын ӵошатсконын вормисе потэм Кальтяево но Улысь Балтач школаосысь командаослэн капитанъёсынызы флагез ӝутонэн но одӥг минут чус улонэн усьтӥськиз. Улысь Балтач школалэн Кызыл-Яр гуртысь филиалэныз кивалтӥсь З. А. Шаймарданова, Улысь Балтач гурт поселенилэн администрациеныз кивалтӥсь Э. Б. Рахимзянов, Татышлы но Балтач ёросъёсъя военком А. Ф. Арсланов, Россиысь ДОСААФ-лэн Татышлы ёросысь ёзэтэныз кивалтӥсь М. С. Самигулов, Улысь Балтач гурт поселениысь ветеранъёслэн огазеяськонэнызы кивалтӥсь Г. Г. Гарифанов нылпиослы Атыкай музъемез яратон мылкыд пыӵатонын Сергей Самиевлэсь адӟем карымон солдат луэмзэ пусйизы, Сергейлэн анаезлы Лидия Минимардановналы тазалык, ӵошатсконэ лыктэм куасчиослы вормон сӥзизы.

Эстафетаез Кызыл-Яр, Калмияр, Кальтяево, Улысь Балтач школаосысь командаос усьтӥзы - соос основной школаос понна ӵошатскизы. Кальтяево школаысь Инесса Самиевалэн нырысетӥ кругез туж ӝог ортчемезъя но выдыса усто ыбылӥськемезъя тодмо луиз: кальтяевоос нырысетӥ интыез нокинлы уз сётэ. Куас сюрес но ыбылӥськон калмияръёслы секытгес сётскиз. Куинетӥ этапын бызись Улысь Балтач командаысь Дарья Туктамышева одӥг ыбеменыз кык мишенез уськытӥз ке но, штрафной круге пыроно луиз. Озьыен, вормисе потӥз Кальтяево школа. Кыкетӥ интыын луизы кузёос, куинетӥ – Улысь Балтачысь спортсменъёс.

Тани выль татышлыос но Улысь Балтач школалэн кык командаез стартэ султӥзы - шор ёзо школаос понна ӵошатскисьёс. Улысь балтачъёс чырткемесьгес но лэчыт синмогес луизы. Соос нырысетӥ но кыкетӥ интыосты утӥзы. Выль татышлыос куинетӥ луизы.

Вормисьёсты медальёсын, Данъян грамотаосын, кузьымъёсын дунъязы. Нырысетӥ интые потэм командаос кубок басьтӥзы. Вормисьёс пӧлы шедьымтэ командаез но синпель кузьымъёсын пусйизы. Ужрадэз дасясьёс спонсор юрттэт возьматэмзы понна Улысь Балтач гурт поселенилэн администрациеныз кивалтӥсьлы Эдуард Рахимзяновлы но «Рассвет» СПК-ысь Кызыл-Яр бригадаен но фермаен кивалтӥсьлы Евгений Самиевлы тау кылъёссэс верало.