Азьпал улонзэс гуртэн герӟало

Дмитрий механизаторлы Бадӟым Гондырын ик дышетскем. Али со Т-150 тракторен ужа. Бордаз бульдозер но юнматэмын. Со котькуд ужзэ лулысь-сюлмысь быдэсъя. Техниказэ но ӟеч вала: тупатоно ке, ачиз ик лэсьтэ. Хозяйствоен кивалтӥсьлэн О. Р. Фатталовлэн малпанэз вань – сюлмо ужасез Бардае механиклы дышетскыны лэзьыны. «Дмитрий ноку «уг» уз шуы, солы котькуд ужез оскыны луэ, ужзэ эшъёсыныз кенешыса лэсьтэ, тупатъян ужъёсын ваньзылы юрттӥськыны тырше», - вера егит механизатор сярысь трактор паркен кивалтӥсь Владимир Шайдуллин. Кылем арын Д. Дунаев мускыт пытсанын 127 га музъемез гырем, силос лёганын 141 час тыршем, 780 т силос донгам, 99 т силос но вож масса нуллэм, 80 га музъеме ю тысь кизем.

Школаез быдтэмез бере Дмитрий пӧртэм интыосын ужам: Москвае но ветлэм, Куедаын евро укноос пуктылӥсь фирмаын но тыршем. «Аслад улэм интыяд ужаны умой. Дорын ӝытлы быдэ семья возьма, уждун дыраз тыро», - шуэ Дмитрий. Азьмынӥсь трактористлэн вӧзаз - валась но вань ужъёсызлы дурбасьтӥсь кузпалыз, Стелла но Изабелла нылъёсыз, Матвей пиез.

Виолетталэн ки улаз 47-50 вордскем кунянъёс лыдъясько. Соос ӟеч мед будозы, медаз висе шуыса, та ужын ваньзэ учконо: кезьыт но, пӧсь но, тӧло но медаз луы. Возён интызы чылкыт но кӧс мед улоз. Виолетталэн вань куронъёсты чакласа ужамез аслэсьтыз емышъёссэ вае: кунянъёсыз юн, таза будо. Фермаен кивалтӥсь Альфред Муллануров Виолетта сярысь кыл кутыны быгатӥсь, ӟеч мылкыдо, ужзэ яратӥсь шуыса вазиське. Али со капчи уже потэмын – нуназе возьмаськись.

Лулысь-сюлмысь ужало, тыршыса уло, пиналъёссэс будэто. Та кылъёс Дунаевъёслэн егит семьязы сярысь. Али Дмитрий корказы тупатон ужъёс лэсьтэ. «Ваньзэ ӵош лэсьтыны уг луы, каллен ужало, тупато», - шуэ со. Кузё пиосмурт матысьёсыз сярысь сюлмаськемзэ, азьпалан но гуртын улон малпанъёссэ озьы возьматэ.