-18 °С
Салкым
Антитеррор
Вань иворъёс
Нацпроекты
6 Июне 2019, 13:35

Выль нацпроектъёс улонэ пыӵало

Кунмылэн калыкез сярысь сюлмаськемез берло аръёсы юн шӧдӥське. Пӧртэм программаосты быдэстыны висъям коньдонлэн быдӟалаез но сое яркыт возьматэ.

Россилэн Президентэз Владимир Путин со пумысен шуиз: «Воштӥськонъёсты городъёсын но, гуртъёсын но улӥсьёс мед шӧдозы. Проектъёс кагаз вылын гинэ медаз быдэстӥське». 12 пӧртэм нацпроектъёсты быдэстон понна куать ар ӵоже огъя 28 триллион манет висъяськоз. Со пӧлысь 175,1 миллиард манетэз – Башкортостан Республикалы.
Демография
Башкортостанын одӥгез валтӥсь проект луэ «Демография», малы ке шуоно 2016-тӥ арысен ӧжытгес нылпиос вордӥсько. Лыдпусъёсты будэтон понна школаос, эмъюртъёс, сюресъёс ӝутоно. Башкортостанын та ужпумез быдэстонлы 34,4 миллиард манет висъяськоз. Со пӧлы, кылсярысь, трос нылпиен семьяослы льготной ипотека, нылпи садъёс ӝутон но мукетыз пыремын. «Нылпи сад ӝутон шор лыдын 100-150 миллион манет усе. 2019-тӥ арын гинэ республикаямы 19 нылпи садъёс ӝутоно но выльдоно. Туннэ нуналэ нылпи садэ путёвка басьтыны куинь арессэс тырмымтэ 5400 пиналъёс сыло», - вера БР-ысь дышетонъя министрлэсь ужзэ быдэсъясь Айбулат Хажин.
Тазалыкез утён
«Здравоохранение» Нацпроект калыклы нырысетӥ юрттэт возьматонын, эмъюртъёсты эмчиосын тырмытонын, онкологической висёнъёсын нюръяськонын пайдаё луоз. Со понна 16,4 миллиард манет коньдон висъяськоз. Соин туэ 18 нылпи поликлиникаосын тупатӥськон ужъёс быдэстозы, выль эмъюртъёс ӝутозы. Со сяна, 22 фельдшерско-акушерской пунктъёс пуктыны чакламын, 27 передвижной медицинской комплексъёс басьтозы. Солы 625 миллион манет кошкоз. Ёросъёсысь эмъюртъёсы нацпроектъя выль оборудованиос бертозы.
Дышетон
Дышетон удысэз азинтон понна 17,5 миллиард манет коньдон сётӥськоз. Соин матысь кык ар ӵоже 21 выль школа усьтозы. Озьы 2024-тӥ арозь республикаямы кык сменаен дышетскон уз луы ни. Гуртъёсысь школаосын дышетскисьёсты но шумпоттозы, дышетскон юртъёслэсь материально-технической базазэс юнматозы. Туэ куинь выль технопаркъёс усьтӥськозы. Отын нылпиос робототехникаен, аэрокосмической инженериен вырыны быгатозы.
Культура
Культуралы 6,3 миллиард манет висъяськоз. 2024-тӥ арозь бадӟым саклык висъялозы гурт интыосысь культура юртъёсты тупатонлы. Со понна 2,1 миллиардлэсь тросгес коньдон висъямын ни. Нош клубъёссы луымтэ гуртъёс понна автоклубъёс басьтозы, выль модульной библиотекаос усьтозы.
Улон юрт ӝутон
Улон юрт ӝутонлэн быдӟалаез араз 1,5 поллы будыны кулэ. Радий Хабировлэн малпамезъя, лыдпусъёс бадӟымесь, озьы ке но соосты быдэстыны луоно. Республикаын араз 135 сюрс «квадратлэсь» ӧжыт социальной юрт ӝутоно ӧвӧл.
«Городская среда» программа 142 общественной интыосты – паркъёсты, скверъёсты, шутэтскон интыосты - тупатыны юрттоз.
Сюресъёсты тупатон
«Безопасные и качественные дороги» программаез быдэстыны федерал бюджетысь 9,4 миллиард манет коньдон висъяськоз, республика бюджетысь – 24 миллиард манет. Висъяськем коньдон выжъёсты выльдыны, сюресъёсты тупатыны кошкоз. 2017-тӥ арен ӵошатыса, сюрес вылын бырисьёслэсь лыдзэс куинь поллы кулэстоно.
Башкортостанын матысь аръёсы трос коньдон висъяськоз котыр улосэз утёнэн, калыкез ужен тырмытонэн, ужбергатонэз, наукаез, цифровой экономикаез азинтонэн, республикаямы поттэм вузъёсты вӧлмытонэн герӟаськем нацпроектъёсты быдэстонлы. Вань нацпроектъёс ог-огенызы пырак герӟаськемын. Зэм, соос пӧлысь куд-огаз лыдпусъёс вормонтэм бадӟымесь адӟисько. Но кивалтэт оске: огъя кужымен малпанъёс быдэсмозы. Соку Россиысь котькуд адями данъяськыса шуоз: «Мыным кельше таӵе улон».
Дасяз Ольга
НИГАМАТУЛЛИНА.
Читайте нас в