-11 °С
Салкым
Антитеррор
Вань иворъёс
Интыысь аскивалтэт
27 куартолэзе 2020, 16:42

Малпанамы - гуртъёс куспын ӵошатсконъёс ортчытъян

«Единая Россия» партилэн «Реальные дела» проектэз 2015-тӥ арысен быдэстӥське. Кызьы тодӥськом, солэн валтӥсь малпанэз – Башкортостанысь городъёсысь, ёросъёсысь, гурт поселениосысь ужпумъёссылы сӥзем кичӧлтонъёссэс учкон но соосты улонэ пыӵатыны коньдонэн юрттон.

Вераны кулэ, пӧртэм программаосын быгатыса кутӥсько тросэз удмурт гурт поселениос. Сыӵеос пӧлы пыртыны луэ Янаул ёросысь Вуж Вараш гурт поселениез но. Та программае проектэнызы пыриськыса, вуж варашъёс алигес Наняды гуртлэн клуб азбараз спортивной площадка пуктӥзы. 120 сюрс манет тыр оборудованилэсь но сое пуктонлэсь 100 сюрссэ кунмы тыриз, нош гурт администрацилэн люкетэз 20000 манет луиз. Сеткаен волейбольной стойкаос, футбол шудон капкаос, баскетбольной щит, кык ӟечыран – тае ваньзэ лэсьтон понна Нефтекамскысь «Цитадель» фирмае вазиськизы. Отын ужасьёс соосты ик пуктыса кельтӥзы.
Наняды гуртын мыло-кыдо калык улэ. Гуртысь клуб котырез-а утялтоно, ошмесъёсты-а тазатоно, соос ноку пумитъяськыса уг уло: дэмен ужало, ӵош шутэтско. Спортэн вырон площадказы но огшоры ним понна пуктэмын ӧвол,дыр. Оскиськом, татысь калык уз быры. «Нанядыослы туж кулэ вал спортэн вырон инты. Вань гуртэн шудылом. Туп сётӥсьёс но вань ни. Малпанамы - гуртъёс куспын футболэн, баскетболэн, волейболэн ӵошатсконъёс ортчытъян», - шумпотэмзэ уг ваты клубен кивалтӥсь Лилия Гарифуллина.
Гуртын 150 адями лыдъяське. Тямыс нылпи Вуж Вараш школын дышетске, кыкез - пичиос. Соос но клуб азбаре шудыны, ӟечыраны шумпотыса мынозы, дыр.
Анна БАЙДУЛЛИНА.
Янаул ёрос.
Читайте нас в