Ар пумын быдэстэм ужъёс шумпотто

Улысь Балтачын улӥсьёс 2020-тӥ арез пумитаны тыршыса дасяськизы. Культура юрт азьын кыӵе гинэ фигуркаос ӧвӧл. Пӧртэм тылъёсын ворекъясь гирляндаос праздник мылкыд кылдыто. Зэмос выжыкылэ шеди, кожалод.

Таӵе чеберлыкез кылдытон сярысь сюлмаськиллям гуртысь пӧртэм интыосын ужасьёс. «Улысь Балтач гурт поселенись депутатъёс нырысьсэ Выль аре лымылэсь фигуркаос лэсьтыны мылкыд каризы. Бадӟым тау ваньзылы, кин лымылэсь аспӧртэм городок кылдытыны юрттӥз», - вера Улысь Балтач гурт поселенилэн администрациеныз кивалтӥсь Эдуард Рахимзянов.

Кылем арын Улысь Балтач гурт поселение Башкортостанысь Инкуазь ваньбурен пайдаяськонъя но экологияя министерстволэн одӥгаз конкурсаз пыриськиз. Отын вормисьёс пӧлы шедьыса, ошмесэз тупатыны луонлыксы кылдӥз. Тупатъян ужъёс бордын гурт калык, кибашлыос Данис Туктамышев но Ильдар Гузаиров, Эдуард Рахимзянов, Олег Зидыганов, Виталий Бабин, интыысь ужбергатӥсь Евгений Минияхметов тыршизы. «Вераны кулэ, гурт поселениын лэсьтӥськон ужъёс ке луо, Д. Туктамышевлы но И. Гузаировлы вазиськиськом. Соос котькуд ужзэс тыршыса быдэсто, йылаз-пумаз вутто», - вера гурт поселенилэн администрациеныз кивалтӥсь. Ошмесэз усьтон ужрадын соосты Улысь Балтач гурт поселенилэн администрациезлэн Тау карон гожтэтъёсыныз пусйизы, «Ошмес» но «Единая Россия. Башкортостан» газетъёслы подписка кузьмазы. Республика конкурсэ пыриськыны юрттэмез понна улысь балтачъёс тау кылъёссэс верало Татышлы ёрос администрациен кивалтӥсьлэн ӝутӥськонъя воштӥсезлы Альфит Мустафинлы.

Кылем ар пумын уллапалась выльдэм ошмес гуртооссэ шумпотыса пумитаз. Ошмесэз усьтыны трос калык люкаськиз. Соослы задор мылкыд кузьман сярысь сюлмаськизы гуртысь культура юртын, библиотекаын ужасьёс. Шудонъёсы, ӵошатсконъёсы калык шумпотыса пыриськиз. Ошмеслэн юзмыт вуэныз быректытэм чай кырын туж ческыт кошкиз.