Ӵошен ужаны капчи

Улысь Балтач гуртын улӥсьёс «Программа поддержки местных инициатив» проектэн пайдаяськыса, асьсэос коньдон юрттэт возьматыса, гуртъёсысьтызы урамъёссэс тупатӥзы. Соос вуоно арын но та программаен пыриськыны мылкыд каро.

Гуртысь культура юртын ортчем собраниосын калык тужгес сюлмаськытӥсь ужпумъёсты ӝутӥз. Гуртазы шутэтскон инты лэсьтыны, микроавтобус, МТЗ трактор басьтыны, шай котырез кенераны, школалэсь укнооссэ воштыны ӵектӥсьёс, тылпу кысон машинаез интыяны гараж ӝутон сярысь малпаськисьёс но вань. Азьпалан итоговой собрание луоз. Отын куара сётон радъяськоз: калык кыӵе ужпумез быръёз, со ужез ик вуоно арын быдэстоно луоз.

ППМИ-ен пыр-поч ужасьёс проектлэсь куд-ог тырмымтэоссэ но шараяло. «ППМИ-лэсь положенизэ учконо ке, куд-ог пуентъёсы тупатонъёс пыртыны луэ. Соос бордын мед ужасалзы. Кылсярысь, гуртын улӥсь калыклэн 50 процентэз собрание пыриськыны кулэ. Со калык пӧлы нылпиос но пыро. Нош, кызьы тодӥськом, собраниосын, быръёнъёсын 18 ареслэсь бадӟымъёс гинэ куара сётыны быгато», - вера Улысь Балтач гурт поселенилэн администрациеныз кивалтӥсь Эдуард Рахимзянов.

Лыдэ басьтыны кулэ вахта амалэн ужасьёсты но. Соос котькуд собрание дыръя доразы уг луо. Арлыдоос сярысь но вунэтоно ӧвӧл. Тросэз, тазалыксы ляб луэмен, кенешонэ потыны уг быгато. Конкурсын вормон понна калыкез люканы быгатоно. Улысь Балтачысь 300-лэсь трос адями собрание пыриськиз ке, проектэн пайдаяськыса, бадӟым ужлэн быдэсмонэзлы оскыны луоз.