Огкылысь луыса ужано

Гурт поселениос «Программа поддержки местных инициатив» проектэ азинлыко пырисько. Ермекей ёросысь Купченейын но ППМИ-лы сӥзем собрание ортчиз.Гурт калык конкурсэ пыриськоно шуыса огкылэ вуиз. Купченейёсты тужгес сюлмаськыто вылэм кык бадӟымесь ужпумъёс – со шай котырез кенеран но гуртысьтызы социально-культурной центрзылэсь вуж укнооссэ воштон. Калык нырысетӥ ужпумлы куара сётӥз, малы ке шуоно шай кенеръёс куашкамен, отчы пудо но, пе, пыра.

Суккулово гурт поселенилэн (отчы пыре Купченей) администрациеныз кивалтӥсьлэн Фаниль Галимовлэн кылъёсызъя, та ужлы огъя 750 сюрс коньдон кулэ луоз. Солэсь 112 сюрс 500 манетсэ интыысь бюджет выжтоз. Собраниын котькуд юртысь сюрс манетэн коньдон люканы кенешизы. Проектлэн куронъёсызъя, конкурсын вормон понна, спонсор юрттэт но возьматӥськыны кулэ. КФХ-ен кивалтӥсь Дмитрий Мокеев юрттыны мылкыд кариз – со 10 сюрс манет коньдон сётоз.

Кинлэн техникаез вань, кинлэн дырыз луоз, соос шайез кенерасьёслы юрттӥськозы, ужасьёслы кӧттыр пӧзьтозы. Кызьы пусйиз Фаниль Рамзиевич, табере конкурсын вормонэз витёно.

Дасямын «Ермекеевские новости» газетысь материалъя.