-18 °С
Салкым
Антитеррор
Вань иворъёс
Интыысь аскивалтэт
19 Октябрь 2017, 12:26

Гуртъёс уз быре, соос улозы, азинскозы

Татышлы ёросысь Улысь Балтач гурт поселение дас одӥг гуртъёс – Улысь Балтач, Вылысь Балтач, Дубовка, Бигиней, Утар-Елга, Кызыл-Яр, Ивановка, Таныповка, Кытки-Елга, Альга, Танып-Чишма - пыро. Ёросын со тужгес бадӟыменыз гурт поселениен лыдъяське. Сое пичи «удмурт дунне» шуыны но луоз. Со гуртъёс пӧлысь одӥгез гинэ бигер гурт.

Интыысь аскивалтэт гуртын улон луонлыкъёсты ӟечомытон, умойгес карон сярысь сюлмаське. Улон интыяз гинэ уг сылы угось. Пӧртэм программаосын, азинлыко ужась проектъёсын пайдаяськонлы но татын бадӟым саклык висъяське. «Единая Россия» партилэн «Реальные дела» проектэзъя трос ужъёс быдэстэмын. Нырысь ик улысь балтачъёс Бадам ошмесэз тупатыны мылкыд каризы. Туннэ нуналэ выльдэм ошмесэ гурт калык шумпотыса вамыштэ. Семья кылдытӥсь егит кузпалъёс но ошмесэ чылкыт вулы васько. Озьы ик та проект Быдӟым Атыкай оже быремъёслы сӥзем Улысь Балтачысь памятниклы кыкетӥ улон «кузьмаз». Туэ «Реальные дела» проектэ Бигиней гуртын улӥсьёс пыриськизы. «Бигинейын кык ошмесъёсты тупатыны чакламын вал. Одӥгез ошмес лэсьтэмын ни, кыкетӥяз но матысь дыре тупатон ужъёс быдэстӥськозы», - вера Улысь Балтач гурт поселенилэн администрациеныз кивалтӥсь Эдуард Рахимзянов.
Котькытын сямен, таяз гурт поселениын но одӥгез сюлмаськытӥсь ужпум – со сюресъёсты, урамъёсты тупатон.
Вылысь Балтач гуртын улӥсьёс, кылсярысь, тулысэн-сӥзьылэн, зоро гужем нуналъёсын гуртазы машинаосын пыраны быгатытэк улӥзы. Дэриё ульчаостӥ пыдын гинэ ветлыны луэ вал. Табере урамъёстӥ котькыӵе зор дыръя но капчиен ортчыны луэ. Сюресъёс тупатэмын. Таӵе секыт югдурысь потыны юрттӥз «Программа поддержки местных инициатив» проект. Пусъёно, та проектэ пыриськон борды Улысь Балтач гурт поселение ёросын нырысетӥен басьтӥськиз. Калык табере тодэ, ӵошен кариськыса, пӧртэм проектъёсын пайдаяськыса, бадӟымесь ужъёсты быдэстыны луэ шуыса.
Вылысь балтачъёслэсь адӟем карыса, Улысь Балтачын улӥсьёс но урамъёссэс тупатыны мылкыд каризы. Проектэ пыриськон этапъёс ортчемын, конкурсын вормон утэмын. Вуоно гужем Улысь Балтачысь Центральной, Комсомольской но Южной урамъёс тупатӥськозы.
Альгаын улӥсьёс но гуртазы нуись сюрес пумысен трос ӝожтӥськоно луизы. Туннэ нуналэ, ёрос администрацилэн юрттэт возьматэмезъя, Альгае сюрес лэсьтон ужъёс азинтӥсько.
- Ужын бадӟым юрттэт – со кварталлы быдэ республика бюджетысь висъяськись 125 сюрс манет тыр коньдон. Сюресъёсты утялтон, толалтэ урамъёсты усьтан быдэсак со коньдонэн быдэстӥське, - вера Эдуард Бурханович. Со дыре ик кивалӥсез коньдонэз котькуд гурт поселенилы огвыллем висъямзы малпаськытэ: куинь гуртъёслэсь сылӥсь гурт поселение но со коньдонэз ик басьтэ, дас одӥг гуртъёслэсь сылӥсь, 1769 адями улӥсь гурт поселенилы но сомында ик коньдон висъяське.
Улысь Балтач гурт поселениын улӥсьёс ӝутӥськонъя программаосын но пайдаясько. Выль корка ӝутыса, вордӥськем гуртазы ик выжы лэзем егит семьяос – со гуртлэн вуоноез: гурт уз быры, со улоз, азинскоз.
Миляуша БУЛАТОВА.
Татышлы ёрос.
Читайте нас в