Школаын дышетскисьёс Расул Гамзатовлэн творчествоеныз тодматскизы

Расул Гамзатов Россиын гинэ ӧвӧл, быдэс дуннееын тодмо кылбурчи. Солэн кылбуръёсыз олокӧня кылъёсы берыктэмын. Туннэ нуналэ но анайлы, кышномуртлы ненег яратонэн пыӵам кылбуръёсты калык уг вунэты.

Расул Гамзатович тужгес но тодмо луиз кырӟанлы пӧрмем «Белые журавли» кылбуреныз. Отын со вера ожын бырем солдатъёс сярысь. Соос, пе, оже ӧз бырелэ, тӧдьы туриослы берытскизы.

Кылбурез но огшоры гожтэмын ӧвӧл. 1963-тӥ арын Уйпал Осетиысь Дзуарикау гуртын обелиск пуктӥзы. Отын куректонэн губыртскем анайлэн йыр вылтӥз сизьым туриос лобӟо.

Зэмос мадёслэн верамезъя, Дзуарикау гуртын Газдановъёслэн семьязы улэм. Соослэн сизьым пиоссы вылэм. Быдӟым Атыкай ож кутскем бере ик пиосты войнае басьтӥллям. Куинь пиосызлы похоронка басьтэм бераз, анай сюлэм вормымтэ, чигиськем. Берло эшшо куинь ӝожмыт гожтэт вуэм бере, атайзы  сизьыметӥ пизэ улэпен возьмам. Нош соиз но Берлинэз басьтыкузы, бырыны шедем. Атай сюлэм но бадӟым кайгуэз вормымтэ.

Таӵе кайгу но куректон вылын гожтэмын «Белые журавли» кылбур но кырӟан. Туннэ нуналэ но сое синкылитэк кылзыны уг луы.

22-тӥ октябре Расул Гамзатовен ӵектэм но 2009-тӥ арын ЮНЕСКО-елэн ужкагазэныз юнматэм «Белые журавли» праздник пусйиське. Та нуналэ быдэс дунне тодаз вае ожын бырем солдатъёсты.

2023-тӥ арын Дагестанын гинэ ӧвӧл быдэс Россиын Расул Гамзатовлы сӥзем ужрадъёс радъясько. Калтасы ёросысь Бадӟым Качак гуртысь модельной библиотекаен ӵош татысь школа но, тодмо кылбурчиез сӥлы карыса, 9-тӥ классын дышетскись нылпиос понна нимысьтыз урок ортчытӥзы. Библиотекаын ужась Л.И. Насипуллина Расул Гамзатовлэн кылбуръёсыныз книгаслэсь выставка лэсьтӥз. Озьы ик Лидия Ивановна дышетскисьёсты тодматӥз кылбурчилэн улон сюресэныз, творчествоеныз.

Нылпиос но лыдӟизы Расул Гамзатовлэсь яратоно кылбуръёссэс. Берло ваньзы кылзиськизы «Белые журавли» кырӟанэз.

Фото: Большекачаковская сельская модельная библиотека