Куэм айшетъёсты воштӥз керттэмъёсызлы

Керттӥськыны со пиналысен дышетскем. Умой пӧрме крючокен но, венен но. Нош кӧня пужъятскылэм Лидапай. Али соос ваньмыз культура юртэз шулдырто.

«Уӵы нылэ» кык ар ветлэм бере дэра айшет кулэ луиз но, кема малпаськыса ӧй улы, сыӵе ик пужыосты керттоно кариськи. Вуж куиськон станокъёс но вал ай, малы кулэ на та шуыса, эстыса быдтӥ. Нырысетӥ айшетъёсы пӧртэм тусо кофтаосты, свитеръёсты сэрттылыса керттэмын ай. Собере магазинысь шорт басьтыны кутски. 24 ар ӵоже 40-лэсь ятыр айшет керттӥ ни. Дорысь мукет ужъёсты быдэстыса но, ог арняскыны огзэ керттыны луэ. Дэремъёс но керттылӥ. Нылы Динара но керттӥське. Со мынэсьтым устогес быгатэ ини», - вера кибашлы апай. Ансамбльысьтызы мукет кышномуртъёс но дышетскизы. Зэм соиз – котькытысь мед пумиталод таӵе айшет, «Уӵы ныллэн» со визитной карточкаез. Таӵе айшеттэк соосты син азе пуктыны уг луы ни.

Лидапай жаккардовой узорен (тазьы нимаське пужыосын сураса керттӥськон техника) керттӥськемез уг поты ни, сураськисько, пе, айшетлэсь мыдлань палзэ керттыкуз. Аресэз но 80-лэсь ятыр ни уго. Солэсь мытэм ужзэ азьланьтӥсьёс табере тырмыт ни. Нош киужен выремысь со ноку уз дугды, дыр. Выж вылэ чебересь пужыосын курико венен керттэм выж легетъёс, покрывалоос, накидкаос – таӵеоссэ керттыку трос малпано но лыдъяно ӧвӧл. Озьы но чебер пӧрмо. Ӧтьыкузы чебер удмурт костюмзэ дӥсяса, Лидия Гайдулловна дышем сяменыз культура юртэ вамыштоз. Отын со эшъёсыныз ӟабыльтоз-вераськоз, ужрадэ пыриськоз, азьпалан улыны кужым басьтоз. Нош ваньмон дыръяз нош ик кутоз веньёссэ, поттоз шортъёссэ но кутскоз маке чеберзэ пӧрмытыны.