Эшъяськон гурлэн пумыз медаз луы

Калтасы ёросысь культура удысын тыршисьёс та выллем фестиваль-конкурс  радъян сярысь кемаласьгес ни малпало вылэм. Татысь учкисьёсты ӟуч, башкир, удмурт, пор, бигер но мукет калык ансамбльёс учкисьёсты аръёс ӵоже ни шулдырто. Фестиваль-конкурс соосты ваньзэс огинэ люканы юрттӥз.  Проект бордын куинь толэзь тыршизы. Удмурт гуртъёсысь эктонъя нылпи коллективъёсын, кылсярысь, Вылысь Тыхтем клубысь культорганизатор Ольга Хафизова ужаз. «Проект борды кутскыку, Вылысь Тыхтемысь, Бадӟым Качак школаын дышетскись пиналъёсты учкимы. Соос пӧлысь тужгес усто эктӥсьёсты проектэ кутӥмы. Мон куинь коллективлы эктон дасян бордын тырши. Котькуд гуртэ арняяз одӥг пол вуылӥ. Бадӟым Качакын, кылсярысь, кыкетӥ классын дышетскисьёсын ужай, Вылысь Тыхтемын – 5-15 аресъёсын, Чиндэрын – 15 арес нылъёсын. Репетициосы соос котьку шумпотыса лыктӥзы», - вера Ольга Николаевна. Нош Бадӟым Качакысь Тимур но Кирилл Ильбаевъёсын МКДЦ-ысь кырӟась Лилия Матвеева тыршиз. Ильбаев агай-вынъёсты, Чиндэрысь «Купанча», Бадӟым Качакысь «Лучики», Вылысь Тыхтемысь  «Тюрагай ансамбльёсты, фестиваль-конкурсэ пыриськись котькудзэ конкурсантэз сямен ик, сцена вылысь кужмо кичабонъёсын келязы. Вераны кулэ, та нуналэ зол быгатонлыксэс возьматӥзы кылбур  учкытэк верасьёс. Соос пӧлысь тросэзлэн чуръёссы вордскем шаеренызы данъяськонлы, сое утисьёслы сӥземын вал.

Фестиваль-конкурсэ пыриськем 90 нылпиос пӧлысь тужгес устооссэ бырйыны туж секыт вал. Озьы ке но гала-концертын соосты висъязы: «Хореография» номинациын нырысетӥ интыын луиз Улысь Камашысь Фантазия ансамбль, кыкетӥ интыын «Тюрагай» коллектив, куинетӥын – Улысь Качмашысь «Ош пеледыш» но Калтасыысь «Аллегро» коллективъёс. «Вокал» номинациын вормиз Калтасыысь «Мелодия» ансамбль, кыкетӥ интыын – Кутеремысь «Позитив» ансамбль, куинетӥын - Кокушысь Юлиса но Константин Тосаевъёс. «Художественное слово» номинациын Калтасыысь Кира Котовалы вуисьёс ӧз луэ. Кыкетӥ но куинетӥ интыос понна Улысь Качмашысь Анна Ижбулатова но Калегиноысь Эвелина Валикаева шумпотӥзы. Нош фестиваль-конкурслэн гран-приезлы кузё луиз Амзибашысь «Ший онгыр» вокально-инструментальной ансамбль.Конкурсын вормисьёс но отчы пыриськисьёс синпель кузьымъёсын данъямын. Фестивалез радъясьёс оско, та выллем пумиськон берпуметӥез уз луы шуыса. Кутскем ужзэс соос одно ик азинтыны тыршозы, ёросын усточи нылпиос ӧжыт ӧвӧл уга.