Удмурт дӥсьме яратӥсько, удмурт луэменым данъяськисько

Мон - удмурт. Пичи дыръям удмурт дӥськут вал-а, ӧй вал-а мон понна, уг тодӥськы ни. Тодам на, песянае лавка басмаез вуриськись доры нуыса, удмурт дэрем вурытыса вае вал. Нуналлы быдэ нуллон дэремез солэн удмурт яке башкырт дэрем луылӥз. Кыкетӥзэ удмурт фасонтэк со ик удмурт дэремзэ вурись вуре вал. Солэн поколениез удмурт дэремен (айшетэн яке айшеттэк) нуналлы быдэ ветлэ на вал. Базар яке лавка дэрем нуллэмзэ анкайлэсь (песянайме озьы нимасько вал) уг тодӥськы.
Анае удмурт дэрем праздникъёсы, сюанъёсы, концертъёсы гинэ дӥся вал. Татышлы ёросысь Уразгильды гуртын клуб бордын ужась "Етӥн" ансамбле ветлыны кутскыса, нырысьсэ дэра дэрем вурытӥз. Анае ӧвӧл ни, нош со дэра дэрем кылиз.
Дышетскемея но ужея удмурт культураен юн герӟаськемын бере, удмурт дӥськуттэк нокызьы уг луы. Анаелэсь кылемез - тужгес яратоно дэреме. Нылылы кулэ луоз шуыса анае удмурт дӥськут борды трос гинэ кышномурт чеберъяськонъёс басьтылӥз: маллай, сакал, пӧртэм ошетъёс, мылазьуко, ӟырсьпунэт, чылбыр, былэзык.
Эстоние улыны но дышетскыны мынӥ но, Тартуысь удмуртъёслэн "Юмшан гур" ансамблязы ветлыны кутски. Нырысь удмурт костюме ӧй вал бере, Удмуртиысь эшъёсы асьсэпал дэремъёс-айшетъёс ӵектӥзы. Кӧня ке улыса, анайлэсь дэра дэремзэ но айшетсэ нуи. Камсьӧр удмуртъёслэн дӥсьсы трослы висъяське бере, малы ке мынам со дэремез мукетгес, Удмуртиысьёслы кельшымонгес, кареме потӥз. Берен Башкириям улыны берытскыса, мон сое нош ик асьмепал фасонэн, кус вадесказ сӧзыен но паськыт лентаен карыса, тупатӥ.
Али удмурт дэремъёс вуремъя вурем потэ. Кӧт уг тыры малы ке огеныз-кыкеныз гинэ.

Удмурт дӥськутме дӥсясько ке, йыры вылэгес ӝутске кадь, ветлон манере но воштӥське, ваньзылы вераме потэ: "Учкелэ, кыӵе чебер милям калык дӥсьмы!"