Нигиевъёс Янаул ёросысь Выль Вараш гуртынвордскыса будэмын. Арганэн соос пичиысен ик эшъяськиллям. Уго соослэн атайзы, Минтимир агай, вакытаз гуртын усто арганчиен лыдъяськем. Солэсь адӟем карыса, пиосыз но крезьгур дуннеез бырйиллям.
- Кыкетӥ классын дышетскыкум ик мынам гармошкае вань вал, ӵемысь сцена вылэ поталляй. Тямысэтӥ классын дышетскыкум, атай баян басьтӥз. Макем бадӟым шумпотон вал со мон понна! Школаез йылпумъяй но, 1972-тӥ арын Шудекысь культура юртэ ужаны вазизы. Крезьгурчи луыса одӥг ар ужай но, Ижевскысь культпросветучилищее дышетскыны пыри, - тодаз вае Валерий Минтимирович.
Бӧрысь егит студентэз шаермес утисьёслэн радазы басьтӥллям. Крезьгурез яратон мылкыдыз солэн сӥялскымтэ. Кык арскын дышетсконзэ азьланьтэм. Диплом басьтыса, берен Шудеке вуэм, улон интыен но солы татын юрттӥллям. 1993-тӥ арозь со худрукын тыршем. Собере ини тыршись, ужзэ но валась баянистэз культура юртэн кивалтӥсе юнматӥллям. Пенсие потытозяз Виталий Минтимирович та ужзэ быдэсъяз. Лулчеберет ӧрын утэм вормонъёсыз солэн лыдъяса но быдтонтэм, усто ужъёсыз трос Данъян грамотаосын но Тау карон гожтэтъёсын пусъемын. Соос пӧлын – РФ-ысь Культурая министерстволэн Данъян грамотаез но.
Валерий Минтимировичлэн выныз Вуж Вараш культура юртын худрукын тырше.
- Лулчеберетлэн араз культура юртамы тупатон ужъёс лэсьтӥзы. Выль юртмы югыт, шуныт. Ужрадъёсы гуртоосмы шумпотыса лыкто, - вера Радик Нигиев.
Пичи дырзэ тодаз вайыса, Радик Минтимирович шуэ:
- Атайлэн, ӵужапайлэн арганэн усто шудэмзылы паймисько вал. Мон но пӧрмыто меда шуыса ӵемысь малпаськыса пукылӥ. Киям арган кутӥ но – крезьгур кылдӥз. Кыкетӥ классын дышетскыкум баянэн шудыны кутски. Баян вормонтэм секыт ке но, шудӥсько вал.
1980-1982-тӥ аръёсы егит арганчи Янаулысь музыкальной школаын тодон-валан басьтэм. Солы Шудекысь, Выль Варяшысь клубъёсын, школаын но ужаны кылдэм. Бӧрысь, улонлэн куронъёсызъя, солэн уж сюресэз чутрак воштӥськем. Радик Минтимирович гурт хозяйствоын ветврач луыса ужаны кутскем. Бригадирлэсь, фермаен кивалтӥсьлэсь ужъёссэ но со ас вылаз веръям. Нош мылкыдыз ялан крезьгур дуннеез витьыса улэм. Аръёс ортсчыса, Радик Минтимирович выльысь лулчеберет ӧре вамыштэм. 1992-тӥ арын со Уфаын кульорганизаторлы тодон-валан басьтэм.
- 2000-тӥ ар тужгес но тодам кылиз, - шуэ Радик Минтимирович. – Та аре «Югдон» фольклор коллективмылы калык ансамбль ним сётӥзы. Туннэ нуналэ но «Югдонмы» сяськая, котькуд ёрос ужрадъёсы пыриське, республика мероприятиосы но ӵемысь вуылӥськом. Ансамблен Меншакир Шайсламович Шаритдинов усто кивалтэ, солэн кивоштӥсез луэ кузпалы Эльза Григорьевна.
Крезьгур дуннеын улӥсь Выль Варашысь Нигиевъёслэсь семьязэс бускель гуртъёсын сяна, ёросын но ӟеч тодо. Кристина, Ксения нылъёссэс но ӵемысь сцена вылысь пумитаны луэ. Соос учкисьёсты уӵылэн кадь куараенызы паймытъяло.
Тодосчиослэн кылъёссыя, крезьгурез валась адями визьмо но таланто луэ. Соослэн улонысьтызы пӧртэм гуръёсты – вашкалазэ но, туалазэ но – шедьтыны шуг ӧвӧл. Лулчеберет ӧрез быръем агай-вынъёс – Нигиевъёс – крезьгуро шыкыслэн кузёоссы.