Ермекей ёросэ Россилэн 18 регионъёсысьтыз студентъёс, дышетӥсьёс но мукетъёс вуизы. Кык арня куспын соос пӧртэм гуртъёсы вуылӥзы, отысь калыкен, соослэн сям-йылолъёсынызы тодматскизы. Со сяна, куноослы ёросысь пӧртэм предприятиосты возьматӥзы. Ужъёссы йылпумъяськем бере соос егитъёслы сӥзем проектъёссэс утёзы.
Одӥгаз нуналэ куноослэн сюрессы Купченеевое кожиз. Татын соосты нянен, вӧйен пумитазы. Интыысь удмуртъёслэн огазеяськонэнызы кивалтӥсьлэн Анастасия Вождаевалэн ивортэмезъя, татын студентъёслы республикаысьтымы удмуртъёс, гуртсылэн кылдэмез сярысь мадизы. Нош собере «Зангари» ансамбль клубысьтызы сцена вылын «Ӵӧжы табань сиён» йылолэз возьматӥзы. Сое учкемзы бере, куноослэн но удмурт калык дӥськутэз дӥсяны мылкыдзы ӝутскиз. «Макем чебер но узыр адӟиське тӥляд калык дӥськутты, - ӧз чидалэ соос мылкыдзэс вератэк. – Сиён-юонды но туж ческыт».
Туспуктэм: Ермекеевские новости