Сарба

Азьпалан кыӵе ке тыл воректӥз. Мон отчы кожи. Вал возьмасьёс в ы л ӥ л л я м – вить пи­нал пиос но йӧскадь тушо пересь. Тыл­скем вылысь к о т е л о к ы н быректӥсь чай ӵажгетэ.

- Пеймы­тын сутэр куа­рез уд шедьты ни, дыр, - инты­ысьтыз султӥз пересь, - соин ик туннэ виртурынэн гинэ юом.

- Кыӵе со, виртурын, песя­тай? – юаз одӥгез пияш.

- Ма, тани, - сумкаысьтыз ӵуж сяськаё будосъёсты поттӥз.

– Лыктыкумы кӧня ке мо­дос чигтӥ вал.

- Соин чай юыны яра шат?

- Кызьы уз яра? Та – эмъ­юм турын.

Чайзэс парыса, пересь сое кружкаосы лэзьяз. Нырысь ик мыным сётӥз:

- Таиз – сюресчилы, жа­дем ёзвиосыз мед небӟозы.

Ӵын зыно чай ваньмылы ческыт потӥз. Берпум ым­тырзэ гучыктыса, песятай котырак учкиз но шуиз:

- Валъёсмы кыдёке ӧз кариське меда?

Вова нимоез пияш шум­прич выдӥз но пельыныз музъем борды ӝиптӥськиз. Мон ӧй вала, мар со дауртэ. Паймемме валаса, пересь пальпотӥз:

- Таосты мон озьы дышетӥ. Граждан ож дыръя озьы кыл­зыса, ми котьку тодӥськом вал, кудпалась лыктэ тушмон, кыдёкын-а со, матын ни-а. Вал пыд куара озьы кылӥське.

- Таос Пеганык гопе вась­киллям кадь, - шуиз Вова.

- И с ь к е, с е з ь ы п а л а кыстӥсько. Мынэ ай, берыктэ.

Воваен чангес куараё эшез бызьыса кошкизы.

- Вот кайванъёс, - вазиз пересь. – Котькуд лул аслыз мар кулэзэ тодэ. Тани кион, пе, тӧллы пумит султыса, оломае но шӧдэ: адямиез но, пыӵал зынэз но, пӧйшуръёсты но. Яке, шуом, вал йырзэ урдэ но зынъяськыса солань-та­лань берыкъя: кудпалась сезьы зын кылӥське?

- Кыдан песятай, - пальпо­то пиос, - иське, пӧйшуръёс но, пудо-животъёс но адями кадь визьмоесь-а?

- Котькыӵеез вань. Тани о дӥг в а л с я р ы с ь м а д ё . Тӥлесьтыд но пичигес дыръ­ям милям Сарба нимо ужпимы вал. Атай солы оломабыдӟа нимаз гид пуктӥз: эркын, пе, мед улоз. Азбар кенермы но тупыттэм ӝужыт: Сарба тэт­чыса медаз пот. Кечырскыса азь пыдыныз кенер йылэ су­зиз ке, сое нокызьы уд возь ни, одно лобатоз. Кенермы лапеггес дыръя сыӵе учыръ­ёс вал ини. «Бурдо, дыр, та валды», - паймылӥзы буске­льёсмы. «Ма, зэмзэ озьы, луоз, малпалляй мон. – Сотэк кы­зьы со ӝужда кенер вамен по­тоз?» Зэм, ачим мон бурдъёс­сэ ӧй адӟылы, но лобыштыкуз, пӧй, со бурдъёс кытысьтыз ке вӧлъяськыло ик, дыр. Собере озьы но малпалляй: «Эх, мынам но бурдъёсы мед луысалзы. Соку кытӥ гинэ ӧй лобасал, мае гинэ ӧй адӟысал. Ма, воксё шунды дорозь но ӝутӥськысал!..»

Озьы шуыса, пересь чал­миз но пальышак потӥз. Со­бере, чильымзэ поттыса, сое тамакен тырмытӥз, тылске­мысь сэрегпумен кенжытӥз.

- Да-а, Сарба-а… - нокин шоры учкытэк нёртӥз со, ӵынзэ пельтыса. Собере, та валзэс син азяз пуктыса, выл­ды, нош ик пальыштӥз но шуиз:

- Пичи но тэк улон дырыз ӧй вал ведь. Мугорызлэн вы­рымтэ, шудымтэ интыез ӧвӧл. Вал но уд шу – луло узвесь! Ураме потэ ке, э, лобе ук, э, лобе! Сильтӧл потӥз, ко­жалод, - нырыныз «жи-и-и!» карыса шулатэ. Музъемез зур­катыса ворттэ. Адямиос, оло, иськемысен ик сюрес урдсы кожо. Лёганы, ма, уз лёга но, шурдыт ук. Атае соин Гырон-быдтонлы быдэ ворттылоз вал. Огпол но чалматэк ӧз бертылы. Чалмазэ солэн йыр бордаз думоз но пултыр-пул­тыр тӧлатыса ваёз. Нош ке­зеген висьыса кулэмез бере валмы но сирота кылиз. Сое кутыны дӥсьтӥсь ик ӧй вал. Монэ пичи шуыса ӧз лэзьылэ.  Нош Гербер вуэ ке, Сар­бамы нокытын уг чида ни – ӵабъяське, кыре курись­ке. Гырлыосын сабантуе кошкемзэс-а вала, сыӵе вакыт вуэмез-а шӧдэ. «Котьмар мед луоз, - шуиз огпол анай, - лэзё­но тае». Мар, пе, весь пытсэтын возёд.

Валмес гидысь поттӥм но, капка усьтэмез ик возьмаса ӧз ул, сыӵе ӝужыт кенер йылтӥ лобыса потӥз. Ӝыт пал йыраз чалмаен вуиз. Сабантуез ачиз шедьтэм. Ворттӥсь валъёс радэ султэм. Со дырысен Сарбамес сабантуйлы быдэ поттылытэк ӧз лу. Огпол но йыраз чалматэк ӧз бертылы.

Тӥни соку Сарбамылы Калмиярысь Макар лавкачи синмаськем. Ачиз кутыны медэ вылэм, но Сарба сое ӵыжыса чут кельтэм. Йӧнам бераз дорамы ӟырдаса вуиз. Корказе кык пуд пызь кушты­са кельтӥз но Сарбаез пичи дӧдьы бераз думыса нуиз. Анайлэн бӧрдыса куараез быриз, мынам – синкылие. Нош куинь нунал ортчыса, валмы бертӥз. Мон изисько вал. Анай кушектыса сайкатэ, кинъёс ке, пе, урам тыр ворттыло. Сарбалэсь гырдаллямзэ мон соку ик тодмай. Но урамын, валъёс сяна, нокин ӧвӧл. Тросэз энеръёсын, зарнивуам азвесь шиляосын. Тӧдьыослэн валъёссы вылӥллям. Адӟем адямиос берло кызьызэ-марзэ но веразы.

Лавкачи Макар кылылэм, Сарба, пе, быдьто ке бурдо вал. Уйин потыса, солэсь бурдъёс­сэ адӟоно кариськем. Гидзэ лушкемак усьтэм но, Сарба, ӧсэз йырыныз шуак донгыса, Макарез кыдёке пезьгытэм. Нош соослэн гид тыразы, озьы ик азбаразы но тӧдьыослэн валъёссы вылӥллям. Азбаре потыса, Сарба шукырес ворт­тылыны кутскем. Со сьӧры му­кет валъёс но дуатскиллям. Ворттылыса-ворттылыса Сарба кенер вамен тэтчем. Со сьӧры му­кетъёсыз но. Тӧдьыос мазэ-созэ валаса ик вуиллямтэ – валъёссы гурт сьӧрын ини.

Ми со валъёсты аз­барамы пыртӥм гинэ – гуртамы гордъёс вуизы. Сомында вал шедемлы туж шумпотӥзы. Татчы вуэм­зылэсь азьло, пе, соосты Макарлэн гуртаз ик сэстоно. Озьы Калмияре лобатыны дасяськизы. Но валъёссы интыысьтызы но уг вырӟо, Сарба уг лэзь. Нош ассэ кутэмзы уг лу.

- Ыбоно сое, белогвар­дейской сволочез! – наганзэ поттӥз командирзы.

Зэм, комиссарзы алӥз. Соку мон валэктӥ, со, пӧй, тӧдьыослэн ӧвӧл, соослэсь валъёссэс гинэ татчы вайиз.

- Ваемез понна молодец, но со табере атакаез ӝегатэ.

- Мынэсьтым сяна, та но­кинлэсь уг кылзӥськы, - шу­исько командирлы. – Вае мон но тӥледын мыно.

- Ымдурысьтыд йӧлыд ку­асьмымтэ на, - вазиз со.

Мон бызьыса Сарба доры мынӥ но сермет ӟезьызэ кутӥ. Ымнырзэ маялтыса, лӧбак вы­лаз пукси. Собере «азьлань!» кеськи но, гордъёслы сюрес возьматыса, Калмияр пала лашкинтӥ.

Гуртэз басьтэмзы бере монэ дорам бертыны косӥзы. Но ӝоген гордъёс чигназы. Мон сьӧразы кариськи. Таяз учыре алӥсь ӧз лу ни. Нош трос ик дыр ӧз ортчы – одӥгаз ожын корт чалеп мынэсьтым пыдме сузмытӥз. Мар карод, гуртам берытсконо луиз. Но валъёс­лэсь люкиськеме ӧз поты. Со дырысен вал утисько.

- Нош Сарбаед, Кыдан пе­сятай? – чидатэк юаз Гриша.

- Сое мон комдивлы кузь­май, - мыйыкъёссэ позыръяса шуиз пересь. – Бырыны шедьы­тозяз со вылын ворттылэм.

Кемалась силё куямтэен, тылскем кысон калэ вуэм. Кӧс улвайёс-маръёс октыса, сое выльысь улӟытӥм. Со куспын пеймытын вал гырдалтэм кылӥськиз.

- Сарбаеныз Вова вуэ, - во­жъяськыса кадь вазиз Гриша. Мон паймыса юай:

- Улэп на шат со?

- Сарба выжы, - вазиз пе­ресь. – Со валмылэсь нылзэ но, пизэ но озьы нималлямы. Бен тазэ но тӥни.

- Вовалы гинэ сётӥське, - выльысь вожъяськысагес шуиз Гриша.

- Вова – пиелэн пиез, - пальпотӥз пересь. – Ас выжы­ям мынэм, ерпечка. Адямиос вӧтаса ракетаосын-маин уй­бырто, нош солы Сарба медло.

- Ма, туж умой, - шуисько.

- Озьыез но озьы. Улонын адӟем карымонэз ӟеч сямысь, ӟеч мылкыдысь ӝужа… 

Фёдор ПУКРОКОВ.

Суредэз Василий ПАХОМОВЛЭН.