Заседание улсын Нефтекамск город, Краснокама ёрос но Татарстанысь Актаныш ёрос ӵошен ужан сярысь Соглашение кутӥзы. Азьланяз соос калык лулчеберетэз утёнлы сӥзем ужрадъёссэс валче радъялозы.
Та нуналэ Нефтекамскын «Мирас» картинной галереяын «Два крыла» адӟытон усьтӥськиз. Отын Башкортостанысь но Татарстанысь тодмо суредасьёслэн ужъёссы возьматэмын. Республикаысь Культурая министерствоын ивортэмзыя, туала искусствоя дас куать пӧртэм калыккуспо арт-симпозиумъёсы пыриськем суредаськисьёслэн картинаосынызы 17-тӥ гудырикошконозь тодматскыны луоз.
Нефтекамскын куатьтонлэсь ятыр пӧртэм калыкъёс уло. Соослэн лулчеберетэнызы тодматскыны луиз городысь Культурая но шутэтсконъя паркын. Заседание улсын отын «Национальный калейдоскоп» фестиваль ортчиз. Башкортостанысь Эшъяськон юртсылэн филиалэз - удмуртъёслэн историяя но культурая центрзы удмурт корка дасяз. Нош Татышлы ёросысь Выль Татышлыысь «Шулдыр ӝыт» калык ансамбль удмуртъёслэсь «Корка туй» йылолзылэсь фрагментсэ возьматӥз.
Ужрад Башкортостанысь но Татарстанысь культура удысысь сӥё-дано ужасьлэн Анвар Нургалиевлэн концертэныз йылпумъяськиз.