+14 °С
Салкым
Антитеррор
Вань иворъёс
Лулчеберет
24 куартолэзе , 16:00

Челябинск улосын чузъясько удмурт крезьгуръёс

Башкириысь удмуртъёс пӧртэм мугъёсын улон интызэс воштоно луо. Кин ке уж, умой улон утчаса палэнэ кошке, егит нылъёс кузпалзы сьӧры мыно но мукет интыын улонзэс радъяло.

Челябинск улосын чузъясько удмурт крезьгуръёс
Челябинск улосын чузъясько удмурт крезьгуръёс

Челябинск улосысь Железнодорожный посёлок азьло  нимаз посёлок вылэм, али со Копейск городлэн люкетыныз лыдъяське. Отын туннэ нуналэ 15 удмуртъёс уло. Чугун сюрес вылын ужаны татчы ас вакытаз Удмуртиысь но, Башкириысь но вуылӥллям. Башкортостанысь удмуртъёс ог-огзы сьӧры, матысь ӵыжы-выжыос та интыез кельыштыриллям. Ог-огзы доры куное ветлыса, праздникъёссэс ӵош ортчытъяса улӥллям. Валамон ини, ваньзы ӵош люкасько ке, удмуртъёс кырӟанъёстэк уг быгато пукыны. Чузъяськылӥзы удмуртъёсыз но, бигеръёсыз но.

Интернет пыр герӟаським огеныз та шаере Башкириысь вуэм апаен – Камила Ардуановаен.

«2018-тӥ арлэн пумаз Свердловск шаерысь удмуртъёс, Сосновка поселокын улӥсь «Тюрагай» ансамбле ветлӥсьёс, доразы куное ӧтизы. Соку тюрагайёс мукет интыысь удмуртъёсын тодматскон но удмурт сиён-юонъёслэсь праздниксэс ортчытӥзы. «Тюрагай» ансамбле ветлӥсьёс ми но асьме понна удмурт кырӟанъёс кырӟаськом, культурамес утьыны тыршиськом шуыса тодо вал ини. Праздник культура юртын ортчиз. Ӵапак отын пумиським, тодматским Георгий Шамшияровен, «Урал Кенеш» удмурт оргазеяськонэн кивалтӥсен. Со ӝутъяз милемыз асьмелы ансамбль кылдытыны. Озьы кылдӥз нырысь «Инвожо» ансамбльмы. Сыӵе нимын коллективъёс вань шуыса, сое «Азвесь ошмеслы» воштӥм. Куать кузя кырӟасьёсмы вал нырысь. 2019-тӥ арын инвожо толэзе Георгий Шамшияров «Гербер» празднике ӧтиз. Со Реж городын ортчиз. Отын тодматским Флюра Ахметовна Чибышеваен, Ижкарысь камсьӧр удмуртъёслэн огазеяськонэнызы кивалтӥсен. Олы милям выступленимы туж кельшиз. Со арын ик Флюра Ахметовна милемыз «Чакарае» вазиз. Фольклор фестиваль соку Удмуртиын, Калыкъёслэн эшъяськон юртазы, ортчиз. Озьы кутскиз удмурт дуннелы асьмемыз возьматэммы. Удмурт дӥсь ваньмылы огкадь карыса вурытӥм. Али ми кык кузя кылим на. Кылемъёслэн мылкыдзы куашказ, репетициосы ветлоно, кытчы ке мыноно ке, ас коньдонэныд ветлоно шуыса. Мон ачим Калмиярысь, паре Улысь Балтачысь. Кызылъярысь Люда эше но Улысь Балтаче быземын. Людаен кырӟаськом, асьме культурамес возьматыны тыршиськом. Милям кыкнамылэн вашкала дӥсьёсмы но вань, азьвесь манетъёсын чеберъяськонъёсмы-ошетъёсмы, маллайёсмы», - шуэ Камила Ардуанова, «Азвесь ошмес» ансамблен кивалтӥсь.

- Ансамбльды трослы пичияз ке но, кытын ке выступать кариськоды, дыр, ук? – юасько.

- Ми Копейск город округысь Железнодорожный поселоклэн Петряков нимо культура юрт борды юнматэмын. Копейск ёросын кыӵе ке ужрад луэ ке,  вазьытэк уг кылё. Областе туж ум ветлӥське. Удмурт культурая праздник радъяськом арлы быдэ: удмуртъёслэн сям-йылолъёсынызы, сиён-юонъёсынызы, кырӟанъёсынызы тодматӥськом. Анайлэн нуналэз, Мӧйыослэн нуналзы, Выль ар – та праздникъёс но милесьтым палэнтӥ уг ортчо. Пыриським культура юртлэн отчётной концертаз, кудӥз ортчиз 6-тӥ куартолэзе. Быдӟым вормон нуналэ - 9-тӥ куартолэзе - Копейск городлэн огаз ульчаяз ӟуч кылын "Мой конь" нимаськись кырӟанэз кырӟам. 4-тӥ инвожое Свердловск улосысь Реж городэ  "Урал Кенеш" Удмурт культурая центрлэн 15 ар юбилеяз ӧтизы. Кемалась ум ужаське ке но, вань ни кӧня ке дипломъёсмы но тау карон гожтэтъёсмы Свердловск улосысь но Удмуртиысь.    

 Интернетэ потыло дырын-дырын Копейскысь апайёслэн кырӟанъёсынызы видеоос. Соосты тунсыкъяськыса учко кырӟась кышномуртъёслэн вордскем палъёсазы улӥсьёс. Кырӟало Камила Ардуанова но Людмила Набиуллина удмурт кырӟанъёсты но, бигер кылысь удмуртэ берыктэмъёссэ но. Берыктӥсьсы соослэн асьсэлэн – Людмила апайлэн сузэрез Луиза улэ Вылысь Татышлыын. Соин со бигерез, удмурт кылзэ кадь ик, умой тодэ.

Автор:Анна Байдуллина
Читайте нас в