-21 °С
Салкым
Антитеррор
Вань иворъёс
Лулчеберет
12 куартолэзе , 09:30

Фольклор фестивальёсын сям-йылолъёс утисько

Башкортостанын кык арлы огпол «Дуно марӟанъёс» регионъёс куспысь фестиваль радъяське. Туэ со тямысэтӥ ползэ ортчиз. Россиысь устолыкъя но калыкъёслэн чеберлыко кылёсбурзыя арлы сӥзем фестивале 14 удмурт фольклор ансамбльёс пыриськизы: Башкортостанысь, Пермь шаерысь но Удмуртиысь. Соосты Татышлы ёросысь Улысь Балтач гурт пумитаз.

Фольклор фестивальёсын сям-йылолъёс утисько
Фольклор фестивальёсын сям-йылолъёс утисько

Фестивалез 2019-тӥ арын ортчем «Дуно марӟанъёс» фестивальын Гран-при утэм Татышлы ёросысь Выль Татышлыысь «Шулдыр ӝыт» калык ансамбль (кивалтӥсез Зульфира Зарипова) усьтӥз. Котькуд коллективлэн выступленияз вашкала шӧм пыӵамын вал: соос азьвыл сям-йылолъёсты яркыт возьматӥзы. Учкисьёс тодӥзы, пӧртэм интыосын улӥсьёслэн йылолъёссы маин ке но висъясько, пӧртэмгес луо шуыса.

«Дуно марӟанъёс» фестивале Ермекей ёросысь Купченей гуртысь «Зангари» удмурт калык ансамбль пыриськиз. Соин Галина Христофорова кивалтэ. Зангариос «Ӵӧжы табань сиён» йылолэз возьматӥзы. Учкисьёс, кылсярысь, Улысь Балтачын улӥсьёс, соослэсь выступленизэс асьсэ палан ортчись «Ӵӧжи сиён» йылолэн ӵошатӥзы, дыр. Купченейёс ӵӧжиен куноясь доры буш киын уг вуо. Кин ке йыркышет, кин ке ӵушкон, кин ке чай юыны пыжиськемъёс но мукет пичи кузьымъёс вае. Нош татышлы музъемысь удмуртъёслэн выллем «Ош лекам, мес лекам» веранзы ермекейёслэн но вань. Со кылъёсты вераса, одно ик кымесэ пуньыен шуккозы. 

«Ӵӧжы табань сиён» йылолэз возьматыкузы, зангариос пӧйшуръёс, пудо-животъёс сярысь ӝогверанъёсты но тодазы ваизы, мадиськонъёслы но валэктонъёс утчазы, кутэн но шудӥзы. Берло соос ӵыжы-выжыоссылэсь вашкала такмакъёссэс кырӟазы.

 

Автор:Миляуша Булатова
Читайте нас в