"Ошмес" ансамбльлэн кивалтӥсез - Эстониын Тарту городын улӥсь, Удмуртиын ортчись концертъёсы но пыриськыса вуттӥсь Павел Кутергин. Сое тросэз тодо на Татьяна Хохряковаен дуэтэн кырӟась шуыса. Павел куатетӥ арзэ ини Тартуысь Таллиннэ ветлыса, ошмесчиосыныз репетициос ортчытъя, концертъёсы дася. Ансамбльлэн ёзчиосыз - пӧртэм сямен Эстоние улыны интыяськем Удмуртилэн лымшорысьтыз, шорысьтыз, уйпалысьтыз, Татарстанысь представительёс, огез кышномуртсы - эстонка. Репертуаразы пыремын пӧртэм интыосын улӥсь удмуртъёслэн кырӟанъёссы но, авторскойёс но, калыкысь вуэмъёсыз но. "Ошмес" ансамбль мыло-кыдо пыриське Эстониын ортчись культурной ужрадъёсы, кылсярысь, Ӵыжы-выжы калыкъёслэн нуналъёсазы, Этнолаатэ (пӧртэм калыкъёслэн ярмаркаязы). Этнолаатын, удмурт кырӟанъёс-эктонъёс возьматэм сяна, соос Эстониысь калыкез но пӧртэм кунъёсысь вуэм куноосты удмурт сиён-юонъёсын тодмато.
"Ошмес" ансамбль асьме республикаын ортчем "Такмакфестэ" но пыриськиз. Со 2020-тӥ арын коронавирус паськыт алян вакыт ортчиз. Радъясез БР-ысь Калыкъёслэн эшъяськон юртсы вал. Онлайн амалэн ортчись конкурслэн оргкомитетаз 97 видеоролик вуэм. Соос пӧлын Эстониысь удмурт ансамбль кыкетӥ инты басьтӥз.
Асьсэ калыксылэсь палэнын улыса, "Ошмес" ансамбле ветлыса, эстон удмуртъёс вордскем палъёссылэсь мӧзмемзэс буйгато, учкисьёсты удмуртъёсын, соослэн лулчеберетэнызы тодмато.